Đơ̆ng hlŏh 70 nơ̆r tơroi kăp gĭt găh linh lôch tang ăn teh đak lơ̆m khei ‘năr tơblăh sơ̆, hlŏh 2 khei âu ki Khul sir chă, kôch iŏk kơting linh lôch tang ăn teh đak K75 dêh char Lâm Đồng pơgơ̆r 32 ‘măng năm dăr lăng, akŏm đĭ hlŏh 800 ‘nu bơngai vang jang kŭm hăm lơ kơmăy kơmŏk sir chă, choh kôch hlŏh 2.100 m3 teh, tơmo, tơchă, kôch iŏk đei 26 kơ̆l linh lôch tang ăn teh đak tơ̆ 9 xăh, phường lơ̆m dêh char. Trung tá Trần Xuân Hổ, Yŏng Khul K75, Anih chĕp kơ̆l pơgơ̆r khul linh dêh char Lâm Đồng ăn tơbăt, mưh bơ̆ jang khul hơnơ̆ng iŏk đei tơdrong tơgŭm tôch pơneh đơ̆ng khul kơdră păng kon pơlei tơ̆ tơring: “Dôm tơring, mă loi jĭ Khul jang tơgŭm tơ̆ dôm xăh, phường nhôn jur bơ̆ jang, tôch adrin, jô̆ hloi găh tơmam drăm, kơmăy kơmŏk vă pơgơ̆r sir chă. Kon pơlei tơ̆ tơring kŭm vang tơgŭm tôch lơ, ưh kăl kla jên kiơ”.

Hơdai hăm tơdrong sir chă, kôch iŏk kơting linh lôch tang ăn teh đak tơ̆ lơ anih, jăl jang mă 1 kơ Tơdrong jang 500 măng năr, dêh char Lâm Đồng bơ̆ jang tôch ai găh tơdrong iŏk kơting vă set hơlen, chih hơdăh hơnăn linh lôch tang ăn teh đak tơ̆ 11 pơsat lơ̆m dêh char. Thượng tá Trần Thanh Sơn, Phŏ Kơdră jang Chinh trĭ, Anih chĕp kơ̆l pơgơ̆r khul linh dêh char Lâm Đồng, ăn tơbăt, dôm pơsat linh lôch tang ăn teh đak hlôi đei lơ ‘măng hơmet ming kơna tơdrong sir kôch, iŏk kơting linh kŭm tơƀâp lơ pơmat tat. Rim kăn ƀô̆, linh bơ̆ jang tơdrong ‘nâu bu bu kŭm jang tôch tơnăp, ‘mi pă lăng, prăng pă pơdơ̆h păng hơnơ̆ng tơtă ăn kơdih kâu athei bơ̆ jang mă ‘lơ̆ng, mă hơlen lơ̆m rim tơdrong: “Tŏ ‘mi khei ‘năr âu ưh đei ‘lơ̆ng. ‘Mi hơnơ̆ng mă lei ‘nhŏng oh oei adrin jang đĕch. Jang đơ̆ng pơgê hrôih truh ‘năr dơ̆ng, klĕp kơsơ̆ oei adrin đĕch, khŏm jang đang ‘lơ̆ng hlŏh. Tơdrong chă iŏk kơting đei bơ̆ jang trŏ tơdrong hơgăt đơ̆ng Anih tơm vei lăng khul linh teh đak tơlĕch, mưh chih tơmât lơ̆m kơmăy sô̆, sơng iŏk kơting truh tơdrong hơlen năng kơting păng tăh ƀŭ hơmet dơ̆ng tơ̆ pơsat đei bơ̆ jang tôch hơlen, ưh ăn đei tơdrong hơvơ̆l yă kiơ”.

Lơ̆m 4.776 tŏ pơsat linh tam mă băt hơdăh hơnăn tơ̆ 11 pơsat, khul jang kơpal kơ dêh char Lâm Đồng hlôi iŏk kơting tơ̆ 3.625 tơ̆ pơsat, jang đang hrôih ƀiơ̆ 3 khei păng pơjao ăn Anih jang Phap y kơ Khul linh, Anih tơm vei lăng khul linh teh đak vă pơyoa ăn tơdrong set hơlen ADN. Công an dêh char Lâm Đồng kŭm pơjing 16 anih sơng iŏk kơmẫu, iŏk đei 1.371 kơmẫu pham đơ̆ng kơtum kơtŏng ‘nhŏng oh pang găh mĕ kơ đe linh lôch tang ăn teh đak tam mă băt hơdăh hơnăn, lơ ƀiơ̆ 5 ‘nu bơngai pơting hăm kơsô̆ tơdra.

Nơ̆r tơchĕng đơ̆ng Quân khu 7 akhan, lơ̆m jăl jang mă 1 kơ Tơdrong jang 500 măng năr, Lâm Đồng hlôi tơlĕch jang kơjăp ‘lơ̆ng, tôch đei yoa, lăp hăm 6 rơđăh; chih tơroi, roi tơƀôh hrơ̆ch ‘lơ̆ng, jơ̆p tơring; sir chă, kôch iŏk hăm đon jang tôch tơnăp păng ƀĕnh jơhngâm đon ‘mêm kơeng; tơdrong iŏk kơmẫu tơ̆ dôm pơsat linh đei pơgơ̆r hrơ̆ch ‘lơ̆ng, tôch đei yoa. Ƀok Đinh Văn Tuấn, Phŏ Kơdră vei lăng kon pơlei dêh char, Kơdră Anih pơgơ̆r sir chă, kôch iŏk păng chih hơdăh hơnăn linh lôch tang ăn teh đak kơ dêh char Lâm Đồng, ăn tơbăt, tơdrong jang đei blŭng a đơ̆ng jăl jang mă 1 kơ Tơdrong jang 500 măng năr ‘nŏh jĭ jơhngâm hưch hanh vă dêh char hơnơ̆ng pơgơ̆r năm chă, chơ ba đe linh lôch tang ăn teh đak vih dơ̆ng hăm pơlei pơla, hăm unh hnam păng bôl boăl: “Lâm Đồng jang đang hrôih 3 khei. Jĭ tơring jang đang hrôih hlŏh lơ̆m 4 tơring tơ̆ quân khu. ‘Nâu jĭ tơdrong tôch hơiă đơ̆ng Anih pơgơ̆r jang păng dôm khul linh bơ̆ jang tơdrong jang ‘nâu”.

Đại tá Nguyễn Thanh Quảng, Phŏ Chính ủy Anih chĕp kơ̆l pơgơ̆r khul linh dêh char, Phŏ Kơdră Anih pơgơ̆r sir chă, kôch iŏk păng chih hơdăh hơnăn linh lôch tang ăn teh đak kơ dêh char Lâm Đồng, pơma tơpăt: “Lơ̆m jăl jang ‘nâu đei tơdrong jang nhôn tam mă jang đang ‘nŏh jĭ sir chă, kôch iŏk kơting linh lôch tang ăn teh đak. Trong vă jang đơ̆ng Anih pơgơ̆r jang kơ dêh char pơjao ăn Khul sir chă păng nhôn tơlĕch đon pơhnŏng vă sir chă, kôch iŏk 50 kơ̆l linh lôch tang ăn teh đak, truh dang ei nhôn ‘nao kôch iŏk đei 26 kơ̆l linh lôch tang ăn teh đak. Jăl jang mă 1 tam mă đang, jang tam mă keh”.

Yak mât lơ̆m jăl jang mă 2 kơ Tơdrong jang 500 măng năr, đơ̆ng dang ei truh ‘năr 27/7/2027 dêh char Lâm Đồng tơlĕch đon pơhnŏng khŏm sir chă, kôch iŏk 124 kơ̆l linh lôch tang ăn teh đak. Hăm dôm bơngai iŏk jang tơdrong ‘nâu, tơdrong năm chă ưh lăp pơgĕnh bơ̆ jang lơ̆m khei ‘năr oei đei dơ̆ng đĕch mă oei vă tơƀôh jơhngâm đon ‘mêm bơnê kơ dôm bơngai hlôi lôch tang yoa teh đak. Hăm đon tơnăp, jang tôch ai păng adrin tôch pơneh, dêh char Lâm Đồng oei kơrŭn jơhngâm vă chơ ba đe linh nuih mơng hlôi lôch tang ăn teh đak vih dơ̆ng tơ̆ pơlei pơla kơdih, pơm lăp hăm tơdrong hơpơi ‘mĕh đơ̆ng kơtum kơtŏng ‘nhŏng oh păng bôl boăl./.