‘Mi tih đunh năr, đak đơ̆ng tu ro pơm ăn lơ tơring păih Pơmơ̆t dêh char Gia Lai đak lơ̆p, teh hơlih, trong nơnăm ưh kơ gơh yak vih vơ̆t păng ƀơm ưh kơ ‘lơ̆ng truh jang sa. Tơ̆ xăh Ia Pa, trong gơng Mơ Nang 2 hlôi đei đak lơ̆p, tơklăh hơdrô̆ hloh 300 unh hnam kon pơlei ưh kơ gơh yak vih vơ̆t; gơng tơƀưh Ia Pa hăm Ia Tul đei đak hoch jroh. Dang 7 hek tar ƀa păng hơƀo đei đak lơ̆p. Tơ̆ xăh xã Ia Hiao, hloh 180 hek tar ‘long pơtăm đei ƀơm ưh kơ ‘lơ̆ng, găh lơ ‘noh ƀa, hơƀo păng lơ ‘long pơtăm nai. Dôm xăh Gào, Ia Krái, Phú Thiện kŭm đei ƀôh đak lơ̆p, teh hơlih tơ̆ lơ jăl trong, hơnih tơ ter đak krong, thong đak. Khŭl kơdră tơring hlôi hơvơn khŭl linh, yông kon pơlei lĕch đơ̆ng hơnih krê hơmơt, roi tơbăt dôm hơnih thŭng păng chih jô̆ hiong răm.

Tơ̆ Hơnăp ‘mi tih, pơgê năr 9/9, Hơnih hơlen tŏ ‘mi kial dêh char Đắk Lắk hơnơ̆ng tơƀôh tơbăt hơmơt kơtang mă 1 păng mă 2, ‘noh đei ‘mi tih, kial hơbŭt, grơ̆m glăih, ‘mi prĕr, hơmơt đei đak hơbông, đak jroh păng teh tơdrŭt hơlih. Hloh 300 ‘nu hŏk tro găh 10 lăn tơ̆ 2 hnam trương kơ Hnam trương jăl Kơđeh Chu Văn An, tơring Cuôr Dăng, đei ăn pơdơ̆h hŏk kơ yuơ lơ jăl trong đak lơ̆p, đak lŏk đơ̆ng mir pơgar ksu ro jăng, lơ̆p kơtang. Ƀuôn Aring, pơlei đei hnam trương, hơnơ̆ng răm đak lơ̆p kơtang mưh ‘mi tih. Khul kơdră tơring hlôi apĭnh hơmet pơ ‘lơ̆ng, adoi tơ iung pơjing trong jang hơmet pơ ‘lơ̆ng rim hơnih teh ngăl tơdrŭt hơlih, man hơlŏng đak.