‘Năr dơ̆ng, ‘năr 20/7, tơ̆ xăh Ia Ko, dêh char Gia Lai, Hạ sĩ Kpă Thiệp, linh Trung đoàn 28 (Sư đoàn 10, Quân đoàn 34) lơ̆m jơnăr pơdơ̆h phep, vih đơ̆ng jang mir  ƀôh 2 ‘nu điên hyup pơ̆k ưh kơ hơdơ̆r. Ưh kơ hli tơdrong krê hơmơt, sư mơ̆t tơ̆ anih krê hơmơt dui tơlĕch 2 ‘nu bơngai điên hyup, đang kơ ‘nŏh sư hơngơ̆t hloi. Tơdrong jang tôch nuih đơ̆ng Hạ sĩ Kpă Thiệp hlôi tơgŭm ăn 2 ‘nu bơngai đei dŏng hơrih, mă lei kơdih kâu sư ‘nŏh lôch tang yoa plei nuih rơmơ̆n.

Băt tơdrong nuih mơng đơ̆ng sư, Anih vei lăng kon pơlei xăh Chư Sê hlôi hơpăh Hla ar hôn bơnê, hơdai hăm ‘nŏh khul kơdră pơgơ̆r xăh Ia Ko oei pơm hla ar apinh dêh char hơpăh ăn Ƀăng khen ăn sư. Vă tơtom tơgŭm, pơm pơhơi ƀiơ̆ tơdrong hiong răm tôch kơ dêh âu, kăn ƀô̆, linh tơ̆ Quân đoàn 34 vang tơra tơgop jên tơgŭm ăn unh hnam Hạ sĩ Kpă Thiệp, pơm pơ ‘lơ̆ng hlŏh dơ̆ng um rup ‘lơ̆ng hơiă đơ̆ng "Ƀô đô̆i Ƀok Hô".