Ƀok Nguyễn Hoài Anh rơneh sơnăm 1977, đei hloh 26 sơnăm bơ̆jang, hlôi đei bơ̆jang lơ kơchư̆k jang chĕp kơ̆l tơ̆ Bình Thuận, Lâm Đồng păng đơ̆ng khei 9/2025 truh dang ei ‘noh Kơdră Anih vei lăng kon pơlei dêh char Thanh Hóa.

Pơma pơjao hơnăp jang, Thủ tướng athei Anih tơm vei lăng Hơdrĕch kon kông păng Lui khop akŏm jang tơgŭm chih hơmet pơ ‘lơ̆ng trong jang, tơdrong tơgŭm; proh hơmet khŭl bơ̆jang trŏ lăp tơdrong jang khŭl kơdră chĕp kơ̆l 2 tăl; tơlĕch jang đei yua Tơdrong jang tơm kơ teh đak jăl jang 2026-2030; vei sơđơ̆ng tơdrong soi kơyang, hơkŭm pơhrăm hiôk hian; hơmet ming grŭp tơgoăt tơgoăl đĭ đăng hơdrĕch hơdrŭng, vei kơjăp tơdrong sơđơ̆ng tơring kon pơlei kon kông păng lui khop, hơdai hăm jăh hơnhăk hơnih chih răk găh kon kông, lui khop tơmơ̆t lơ̆m jang ‘lơ̆ng.