Tơ̆ jơ pơma đam, 2 pah sơkơ̆t hơdah tơdrong jang tơbôl Việt Nam – Lào pơtoi hơtŏk 'lơ̆ng tôm tơdrong; drơ̆ng nơ̆r hơtŏk kơjăp hloh tơdrong jang “tơguăt tôm tơdrong jang”, hơtŏk jang hơdoi gah vei lăng sơđơ̆ng tơpôl, atŭm hăm noh pơm trong hơtŏk gah mŭk drăm, tĕch pơdro păng asong jang. Lơ̆m 7 khei blŭng sơnăm ou, Việt Nam đei 20 tơdrong jang đei pơtơm tơ̆ Lào hăm kơsô̆ jên pơkăp jang hloh 638 triu đôlar, tŏk 4,2 'măng pơtêng hăm khei năr ou sơnăm 2025.

Ƀar pah drơ̆ng nơ̆r hơtŏk dôm tơdrong jang tơm, hơtŏk jang hơdoi gah pơtho pơhrăm, joh ayŏ, tơmang pơhiơ̆ păng hơpeh hơpong kon pơlei. Lơ̆m 'măng năm tơmang, Phŏ Thủ tướng teh đak bơ̆n Phạm Gia Túc adoi năm tơmang lăng dôm tơdrong jang hơdoi tơbôl tơ̆ Hơnih tơm Vientiane, lơ̆m noh đei kơmăi kơmŏk vei lăng tơring kon pơlei oei xa, Hơnih pơgơ̆r vei sơđơ̆ng tơpôl kơ Hơnih tơm Kŏng ang Lào, Cham să Tơbôl Lào – Việt Nam păng hơnih gô vă man Hnam trưng Đăi hŏk Hữu nghị Lào – Việt Nam.