Tổng Bí thư Tô Lâm pơgơ̆r păng đei ƀai iung pơma pơih blŭng tôch gĭt kăl tơ̆ hop akŏm. Hop akŏm ‘măng mă âu vă pơma nuh, tơgop nơ̆r hăm 15 tơdrong akŏm găh 2 grŭp tơm, ‘nŏh jĭ grŭp tơdrong hơnơ̆ng hơmet ming khul bơngai jang tơ̆ rim anih jag chinh trĭ, hơmet ming anih vei lăng păng khul kơdră pơgơ̆r tơring 2 tăl đei 8 tơdrong hlôi chih tơroi, mă 2 ‘noh grŭp tơdrong hơnơ̆ng hơmet ăn Hop akŏm Đảng lơ̆m teh đak ‘măng mă 14 păng pôk rơih bơngai tang măt Quốc hội jăl 16 păng Jơnŭm pơgơ̆r kon pơlei jơ̆p tơring jăl jang đơ̆ng 2026 -2031 đei 7 tơdrong păng dôm hla ar chih tơroi.

Găh grŭp tơdrong hơnơ̆ng hơmet ăn Hop akŏm mă 14 kơ Đảng păng pôk rơih Bơngai tang măt Quốc hội jăl 16, bơngai tang măt Jơnŭm pơgơ̆r kon pơlei jơ̆p tơring đơ̆ng 2026 - 2031, Tổng Bí thư pơma hơdăh, đơ̆ng rŏng kơ Hop akŏm Trung ương 10, Anih tơm Chinh trĭ pơtho tơƀôh chih tơroi dơ̆ng lơ tơdrong kăl, mă loi ‘nŏh jĭ trong jang tơm gĭt kăl vă atŏk tơiung  teh đak.