Năr (5/8), Đảng ƀô̆ Kuân đoan 34 pơgơ̆r Hop akŏm 'măng mă mônh, jăl jang 2025 – 2030. Kuân đoan 34 đei tơ-iung pơjing ah sơnăm 2024, kiơ̆ pơkăp tơmơ̆t hơdai Kuân đoan 3 păng Kuân đoan 4, pơm kiơ̆ sơnong jang tơdui đơ̆ng Tây Nguyên truh tơring Hlĕch Pơbah. Khei năr ou ki, Đảng ƀô̆ Kuân đoan 34 hlôi tenh kuăng keh đang jơnŭm jang, dar deh sơkơ̆t hơdah sơnong jang jing anih dơnơm lơ̆m khul linh. Yak ah jăl jang 'nao, Đảng ƀô̆ Kuân đoan 34 sơkơ̆t hơdah, akŏm pơm jang 3 tơchơ̆t hơtŏk jang: hơtŏk pơ-'lơ̆ng tơdrong pơhrăm, pơtho chinh trĭ, vei lăng sơđơ̆ng đon tơchĕng păng pơjing joh ayŏ Ƀô đô̆i Ƀok Hô lơ̆m chăl 'nao; hơtŏk kơtang pơjing khul jang hơgei, kơhret kơjăp kih luơ̆t lơ̆m khul linh hơgei, hơbĕch hơbal, tơnăp, hơmet 'lơ̆ng hanh chinh păng tơplih kơmăi kơsô̆; atŭm hăm noh hơtŏk tơdrong hơgei lơ̆m pơgơ̆r, tơdrong tơjră kơ anih jang đảng tơ̆ tơring păng khul kang ƀô̆, đảng viên.

Pơma ah Hop akŏm, Thượng tướng Võ Minh Lương, Thứ trưởng Anih tơm pơgơ̆r Khul linh, pôk bơnê kơ dôm tơdrong jang đei jơnei đơ̆ng Đảng ƀô̆ Kuân đoan 34 lơ̆m jăl jang ou ki, hlôi đei iŏk jơnei. Hăm tơdrong tơlĕch jang 'nao gah vei lăng Teh đak păng pơjing Khul linh 'nao gơh hơgei, Thứ trưởng sơkơ̆t hơdah Kuân đoan pơtoi pơjing khul linh kơjăp kơtang; kơchăng chă hơlen, tơgŭm ăn Anih tơm pơgơ̆r Khul linh tơlĕch dôm trong jang trŏ ƀlep hăm pơkăp jơnŭm pơgơ̆r tơring 2 tăl.