‘Nhŏng Y Doăn Niê, oei tơ̆ plei A Lê A, phường Ea Kao, tơroi tơdrong pơm VNeID lơ̆m điên thoăi hơgei kơ sư hlôi đei pơm đơ̆ng đunh kơ âu 2 sơnăm păng dang ei hlôi đei tăh tŏk mư̆k đô̆ 2. ‘Nao âu, đơ̆ng rŏng kơ phường đei tơmơ̆t hơdai, Tơdrong jang “Pơtho kon pơlei gơh yua kơmăy kơsô̆” đei tơlĕch jang tơ̆ tơring, sư hlôi pơtho pơm bơ̆n hla ar lơ̆m điên thoăi păng sư hlôi chă pơm kơdih hộ chiếu ăn kon drŏ nglo sư vă năm jang tơ̆ Hàn Quốc lơ̆m hơtuch sơnăm ‘nâu.

“Hơmet ăn tôm tĕch hla ar hô sơ, ĭnh pơm kiơ̆ pơtho đơ̆ng kang ƀô̆ hơdrol ‘noh jĭ pơih mơ̆t lơ̆m Cổng thông tin dịch vụ kơ Anih tơm Kŏng an, đang kơ ‘noh truh pơih mơ̆t tài khoản lơ̆m pơvih pơvăn teh đak păng pơm tài khoản. Đơ̆ng rŏng ‘noh, mơ̆t lơ̆m hơnăn asong hộ chiếu păng chih tăh tôm bơ̆n tơdrong kơtơ̆ng ang đơ̆ng mon lơ̆m hơnih nôp hô sơ trực tuyến. Đơ̆ng rŏng kơ chih tăh tôm ‘noh rơih kla jên trực tuyến kiơ̆ tài khoản păng pơdreo hộ chiếu tơ̆ hnam. Kla jên đang ‘noh gô iŏk đơ̆ng rŏng 15 năr.”

Đơ̆ng rŏng 3 giĕng tơlĕch jang, tơdrong jang Pơtho kon pơlei goh yua kơmăy kơsô̆ tŏk bŏk đei pơih să 1 trong ‘lơ̆ng tơ̆ Đắk Lắk. Tơ̆ lơ xăh, hlôi pơjing dôm Grŭp Kơmăy kơsô̆ tơpôl, hăm bơngai jang kơtă hơnih vă đei tơdrong hiôk pơtho rim bơngai. Ƀok Y Păm Byă, Kơdră Grŭp kơmăy kơsô̆ plei H’ra Ea H’ning, xăh Dray Bhăng, dêh char Đắk Lắk roi tơbăt, đơ̆ng rŏng đei pơhrăm, sư hlôi băt hơdăh păng gơh pơtho kon pơlei lơ̆m pơlei pơm trực tuyến bơ̆n hla ar nhen hla ar teh, hộ tịch, pơgang, ƀao hiêm tơpôl. 

“Ĭnh vih tơ̆ pơlei gô kơtă hơvơn bơngai tang măt kơ 430 ŭnh hnam lơ̆m pơlei năm tơ̆ Hnam hŏk hôp pơlei vă pơtho tơƀôh kơtă, pơtho đe sư băt kơ pơm hla ar. Đe sư kŭm gô pơtho, roi tơbăt dơ̆ng ăn kơ dôm bơngai nai lơ̆m ŭnh hnam găh pơm dôm hla ar âu. Kiơ̆ đơ̆ng noh, roi ‘năr roi lơ kon pơlei lơ̆m pơlei gơh pơm kloh klĕch dôm hla ar kiơ̆ lơ̆m mạng păng phần mềm VNeID.

Dêh char Đắk Lắk băt hơdăh kơmăy kơsô̆ ‘noh jĭ tơdrong tơm vă pơjing khŭl kơdră chĕp kơ̆l tŏ sĕt bơngai, đei yua. Kiơ̆ kơ thoi noh, kơmăy kơsô̆ tŏk bŏk đei tơtĕnh hơmet tôm hăm đĭ đăng dôm xăh. Tơdrong nai dơ̆ng, tơdrong jang “Pơtho kon pơlei gơh yua kơmăy kơsô̆” đei tŭn pran vă hơtŏk ‘lơ̆ng gơh băt ăn kon pơlei lơ̆m iŏk yua dôm kơmăy gơh hơgei.

Ƀok Nghiêm Văn Chuẩn – Bí thư Đảng xăh Đray Bhăng (dêh char Đắk Lắk) roi tơbăt, xăh hlôi pơjing 24 Grŭp kơmăy kơsô̆ tơpôl, tơ̆ 24 pơlei. Tơdrong tơm hơdăh ‘noh jĭ lơ̆m khei 8 âu, tơ̆ hloh 9.700 ŭnh hnam kon pơlei kơxăh, mĭnh ŭnh hnam tă kơ đei tŏ sĕt hloh 1 ‘nu gơh pơm VNeID păng pơm đei dôm hla ar lơ̆m kơmăy âu. Truh đĭ sơnăm 2025, gơh pơm trực tuyến dôm hla ar bơ̆jang.

“Grŭp kơmăy kơsô̆ tơpôl hlôi đei nhôn pơhrăm hơlen păng gô vă năm truh tơ̆ rim hnam tơgŭm kơtă bơngai tang măt rim ŭnh hnam gơh yua kloh klĕch trong mơ̆t pơm bơ̆n hla ar đơ̆ng kon pơlei lơ̆m mạng hăm điện thoại. Hơmĕng đơ̆ng nhôn ‘noh jĭ tang măt rim ŭnh hnam truh hơtuch sơnăm 2025 gô đei hloh 90% ŭnh hnam băt hơdăh đei dôm hơyak pơm hla ar lơ̆m mạng.”

Mă đơ̆ng tơlĕch jang tam mă đunh, tơdrong jang “Pơtho kon pơlei gơh yua kơmăy kơsô̆” hlôi ƀrư̆ ƀrư̆ gơh yua kơmăy kơsô̆ tôm tơ̆ rim pơlei pơla Đắk Lắk. Tơdrong gơh yua kơmăy kơsô̆ đơ̆ng kon pơlei đei hơtŏk lơ ưh khan lăp tơgŭm kon pơlei gơh băt tĕnh hăm dôm tơdrong pơvih pơvăn teh đak trực tuyến mă oei pơm tơdrong ‘lơ̆ng vă khŭl kơdră tơring pơjing khŭl jang tŏ sĕt bơngai, đei yua. Tơdrong vang jang, hơdrin păng pơtho kơtă đơ̆ng dôm grŭp jang kơmăy kơmŏk kơsô̆ kŭm pơih ăn hơmĕng gô đei dôm bơngai pơm gơng tơƀưh kơmăy kơsô̆ kơjăp đơ̆ng kơmăy kơmŏk, khŭl kơdră chĕp kơ̆l păng kon pơlei.