Lơ̆m khei 8 âu ki, hơnơ̆ng rim pơgê, dôm lăm hŏk pơhrăm nơ̆r Yoăn ăn đe hơioh tơ̆ Hnam trưng jăl mônh Nay Der, xăh Gào, dêh char Gia Lai đei pơgơ̆r tôch hơiă. Đe oh đei hŏk chư, pơhrăm pơma, pơhrăm đŏk, pơhrăm chih păng kăl hloh dơ̆ng jĭ pơjing đon nuih, pơ̆n pơma nuh hăm kô pơtho, hăm bôl boăl. Oh Thin, tơ̆ Pley Nhao, xăh Gào, ƀôh tôch hơiă hăm dôm jơ hŏk thoi noh: “Inh năm hŏk tôch chơt. Hŏk nơ̆r Yoăn tôch hơiă.”

Sơnăm hŏk 'nao au, Hnam trưng jăl mônh Nay Der, xăh Gào đei 123 'nu hŏk tro mơ̆t hŏk lăm mônh, đei lơ hŏk tro jĭ bơngai Jarai. Yoa thoi noh, tơdrong pơtho hơdrol nơ̆r Yuăn 'nŏh jĭ tơdrong tôch kăl. Đơ̆ng tam mă juăt, ưh băt yă kiơ, đơ̆ng rŏng mĭnh khei 'năr truh pơhrăm, dôm nơ̆r tơl đơ̆ng đe ŏh roi rơđăh ƀiơ̆. Dôm tơpang ti dai pơ̆n yơ̆r tơ̆ kơpal mưh kô tơlĕch nơ̆r apĭnh.

Hăm kô Lê Thị Thùy Khanh, 'nŏh jĭ dôm tơdrong tôch hơiă ăn pơđĭ hŏk tro păng kô hai: "Lăm inh pơtho tơtă đe oh bơngai kon kông ngăl, tơ̆ hnam đe oh pơma nuh hăm nơ̆r Jarai ngăl đĕch. Mă lei dang ei đe oh adrin hŏk pơhrăm, rim năr hŏk kŭm roi hlôh vao lơ ƀiơ̆. Dang ei đe oh đĭ gơ̆h mơ̆ng, hlôh vao nơ̆r kô pơtho bơih."

Nhen thoi noh mơ̆n, tơ̆ Hnam trưng jăl mônh Lê Hồng Phong, phương Hội Phú, dôm lăm hŏk pơhrăm nơ̆r Yuăn kŭm đei pơgơ̆r lơ̆m pơyan he. Đe oh truh tơ̆ hnam trưng pơm juăt hăm chư tơm, pơhrăm chih chư, pơhrăm đŏk. Tơ̆ lăm hŏk, kô Nguyễn Thị Hồng pơtho chư hai, pơma nuh, apinh đe oh vă đe oh băt trong pơma xa hăm nơ̆r Yuăn hai. Ƀât lăp, kơdih kâu kô kŭm chă hŏk iŏk dơ̆ng dôm nơ̆r Jarai đơ̆ng hŏk tro vă tơdrong pơtho păng hŏk roi hơiă hlŏh dơ̆ng.

“Đe mĕ ƀă hơnơ̆ng pơngơ̆t truh tơdrong hŏk pơhrăm đơ̆ng kon hơ ‘lơ̆p, chơ ba kon năm hŏk trŏ jơ păng hơmet tôm tơmam hŏk pơhrăm ăn kon mon mưh năm hŏk. Đei lơ mon đĭ băt chư tơm bơih, gơ̆h tô chư păng đŏk chư tôch trŏ. Kô kŭm hŏk iŏk nơ̆r pơma kơ đe mon vă gơ̆h hlôh vao đe mon roi lơ ƀiơ̆.”

Kiơ̆ kô Trần Thị Kim Tuyến, Hiê̆u trơng Hnam trưng jăl mônh Lê Hồng Phong, ưh lăp hơdrô̆ phương Hội Phú đĕch, lơ hnam trưng lơ̆m dêh char kŭm pơgơ̆r lơ lăm hŏk nơ̆r Yuăn ăn đe hơioh bơngai kon kông lơ̆m pơyan he. Hnam trưng hơmet tôm tơmam, hơdai hăm ‘noh athei thây kô hlôi đei pơtâp pơhrăm trong pơtho nơ̆r Yuăn, jur pơtho ăn hŏk tro bơngai kon kông adrol kơ mơ̆t hŏk lăm Mônh, hăm 120 jơ hŏk lơ̆m pơyan he, tơgŭm đe hŏk tro hơđơ̆ng jơhngơ̆m yak mât lơ̆m sơnăm hŏk 'nao.

Kô Trần Thị Kim Tuyến tơroi: "Ưh jor kiơ̆ đơ̆ng khei 'năr hŏk nơ̆r Yuăn adrol kơ mơ̆t hŏk lăm Mônh, đe oh hơđơ̆ng jơhngơ̆m, roi pơ̆n pơma xa ƀiơ̆. Yak mơ̆t lơ̆m sơnăm hŏk 'nao, đe oh gô mơ̆t hơdoi hăm hŏk tro nai păng pơm lăp hăm tơdrong ‘mĕh vă mưh hŏk pơhrăm."

Đơ̆ng rŏng kơ tơmơ̆t hơdai, dêh char Gia Lai đei kơsô̆ kon pơlei kon kông truh 23%. Tơdrong pơtho nơ̆r Yoăn ăn hơioh adrol kơ mơ̆t hŏk lăm Mônh tơgŭm đe oh pơ̆n ha ƀơ̆r pơma nuh, hơđơ̆ng jơhngơ̆m ƀiơ̆ mưh yak mơ̆t lơ̆m sơnăm hŏk 'nao. 'Nâu kŭm jing trong jang mă dêh char Gia Lai chă pơjing dơ̆ng tơdrong 'lơ̆ng vă đe hơioh tơring pơmat tat hŏk pơhrăm roi 'lơ̆ng ƀiơ̆./.