Lơ̆m năr 28/9, lơ tơring lơ̆m dêh char đei 'mi pah lăp, 'mi tih, đei tơring 'mi tôch tih. Kơmăng năr 28/9, rim xah, phương lơ̆m tơring teh Lâm Đồng pơtoi đei 'mi, đak 'mi hram lơ̆m teh đơ̆ng 20-40mm, đei tơring hram hloh 50mm.

'Mi tih pơm ăn đak hơbông tơ̆ đak krong, đak glung; teh hơlih tơhlŭn ah teh groi, teh krang, taluy păng dôm jăl trong nơnăm. Hơnih jang hơlen tơroi hơdrol gah tŏ 'mi kial tơroi đak hơbông, teh hơlih hơmŏ pơm ăn trong nơnăm tơhlăk tăk, pơrăm truh tơdrong vih vơ̆t, pơrăm truh tơdrong hơrih xa păng pơjuă truh tơdrong sơđơ̆ng hăm kon pơlei.