Dang ei Simexco Đak Lak jang hơdoi hăm dang 65.000 ha tơring pơtăm, vang yak hơdoi hăm dang 70.000 unh hnam kon pơlei, hơtŏk tơdrong jang xa kơjăp ‘lơ̆ng, chih hơdăh tơmam jang đei păng hơtŏk tơdrong ‘lơ̆ng đơ̆ng cheh phe, tiu. ‘Nâu jĭ tơdrong tơm vă anih tĕch mơdro hơtŏk kơsư̆k pơjei, vang jang roi lơ ƀiơ̆ lơ̆m trong pơtruh tơmam jơ̆p plei teh.

Pơma tơ̆ jơ pơm lêh, ƀok Lương Nguyễn Minh Triết,  Bí thư Đảng dêh char Đắk Lắk, athei Công ty tơm Simexco 2-9 Đắk Lắk hơnơ̆ng hơtŏk hơnăp jang năm hơdrol, chơng hơnhăk, tơƀôh trong chong glung đơ̆ng Anih tĕch mơdro kơ teh đak; tơplih ‘nao trong vei lăng, pơm hơtŏk tơdrong đei yoa mưh iŏk yoa jên teh đak, hơtŏk tơdrong pơm hơmet pơ ‘lơ̆ng tơmam, tưk tơiung hơnăn cheh phe Buôn Ma Thuột păng pơih xă Anih tĕch mơdro lơ̆m apŭng plenh teh.