Bơ̆jang kiơ̆ Tơdrong tơchơ̆t 57 păng Tơchơ̆t 79 đơ̆ng Anih tơm Chĭnh trĭ, khei ‘năr âu ki, Anih tơm vei lăng găh Choh jang sa păng Cham char jang hơdai hăm Anih tơm vei lăng Kŏng an, dôm Anih tơm, anih jang, tơring hơdrin tơlĕch jang, chih pơkeh rim kơ sô̆ chih răk kơ teh đak găh teh, mă loi ‘noh jĭ tơdrong jang pơm lơ, pơm rơgoh kơsô̆ chih răk kơ teh đak găh teh sơnăm 2025. 34 dêh char pơlei tơm hlôi tơmơ̆t hrơ̆ch kơsô̆ chih răk dang 62,4 triệu hơgăt teh. Anih tơm vei lăng găh Choh jang sa păng Cham char tŏk bŏk jang hơdai hăm Anih tơm vei lăng Kŏng an vă chih tơmơ̆t tôm kơsô̆ chih răk kơ teh đak.

Mă lei tơdrong pơtŏ pơm hla kak teh, hla ar hô sơ teh, pơjing, chih pơkeh rim kơsô̆ chih răk kơ teh đak găh teh oei hiơ̆, tam mă pơm lăp hăm ‘meh vă lơ̆m tơdrong ‘nao. Pơma hơdăh ‘nâu jĭ tơdrong hơnat yua kơ hla ar chih răk găh teh hơnơ̆ng tơplih, Phŏ Thủ tướng Hồ Quốc Dũng athei rim Anih tơm, anih jang, tơring athei jang mă brĕ hăm jơhngơ̆m đon 6 rơđăh, pơjing trong jang hơdăh, jang hơnăp jang hơtuch sơnăm athei chih pơkeh rim kơsô̆ chih răk kơ teh đak găh teh.