Tơ̆ jơ tơƀâp, 2 păh akhan tơdrong jang hơdoi găh tơdrong sơđơ̆ng roi đunh roi đei năng kăl lơ̆m tơdrong pơvei kơ 2 teh đak păng pơma hơdăh vă pơm pơ ‘lơ̆ng hlŏh dơ̆ng tơdrong jang hơdoi đơ̆ng dôm anih vei lăng sơđơ̆ng, anih jang kiơ̆ luơ̆t păng tơlĕch trong jang.

Kiơ̆ đơ̆ng tơdrong Pơvei jang hơdoi gĭt kăl tôm tơdrong Việt Nam - Ấn Độ, Tổng Bí thư, Kơdră teh đak Tô Lâm păng Kơdră jang tơgŭm găh tơdrong sơđơ̆ng kơ teh đak Ấn Độ Ajit Doval pơma truh tơdrong ‘mĕh vă jang hơdoi đei yoa hlŏh dơ̆ng lơ̆m tơdrong tơblăh tang găn khul pơm kơnê̆, tơdrong yoch klĕch tơ̆ teh đak nai, hơlĕnh pơdăr lơ̆m kơmăy trưk tuyê̆n păng dôm tơdrong krê hơmơt ‘nao đei, kiơ̆ đơ̆ng noh vang tơgop vei lăng ‘lơ̆ng tơdrong sơđơ̆ng teh đak păng tơdrong sơđơ̆ng lơ̆m tơpôl tơ̆ rim teh đak.

Ƀar păh oei drơ̆ng nơ̆r hơtŏk tơdrong jang hơdoi găh vei sơđơ̆ng păng jang tŏk mŭk drăm, pơih xă tơdrong jang hơdoi găh kơmăy kơmŏk gĭt kăl nhen kơmăy rơgei, tơplih hăm kơmăy sô̆, tơplih ‘nao rơgei, jang unh hơyuh păng pơtho ăn khul bơngai jang rơgei. Găh dôm tơdrong tơ̆ tơring păng lơ̆m apŭng plenh teh, 2 păh drơ̆ng nơ̆r vang vei kơjăp tơdrong rơngei, sơđơ̆ng ‘lơ̆ng hơiă păng yak vih vât hiôk hian kiơ̆ trong đak dơsĭ, trong gre păr; sek tơlang dôm tơdrong tơgar băl kiơ̆ trong rơngei, ‘moi kiơ̆ khôi luơ̆t apŭng plenh teh, mă loi jĭ Tơdrong tơchơ̆t đơ̆ng Liên hợp quốc găh Luơ̆t đak dơsĭ 1982 (UNCLOS 1982).

Lơ̆m ‘măng năm ngôi tơ̆ teh đak Ấn Độ mơ̆n, kơmăng ‘năr 5/5, Tổng Bí thư, Kơdră teh đak Tô Lâm truh ngôi păng pơgơ̆r jơ tơƀâp hăm kăn ƀô̆, bơngai jang tơ̆ Anih tang măt păng khul tơpôl bơngai Việt Nam tơ̆ Ấn Độ.