Pơma tơ̆ hop akŏm, Kơdră Quốc hội Trần Thanh Mẫn akhan, lăng dơ̆ng jăl jang Quốc hội jăl XV jĭ 1 jăl jang ƀĕnh pơmat tat, long nol tơ̆ hơnăp tơdrong jĭ hơbuh COVID-19, apŭng plĕnh teh đei lơ tơplih, lơ̆m teh đak đei ƀôh ‘mi kial hơbŭt pơrăm, bơ̆jang kiơ̆ tơdrong jang tŏ sĕt bơngai jang teh đak. Lơ̆m khei ‘năr ‘noh, Quốc hội hlôi hơdrin, vei kơjăp bơ̆jang kiơ̆ trong jang, tơdrong tơgŭm đơ̆ng Đảng, khôi luơ̆t đơ̆ng teh đak hăm tơdrong jang tôch kơ tih.

Đei dôm khei ‘năr Quốc hội hlôi măh jang năr, jang măng, jang hloi năr Drou, năr Pơh pơvih ăn tơdrong pơm tŏ sĕt bơngai jang, pơgơ̆r, đei yua, jơnei ‘lơ̆ng... Kơdră Quốc hội Trần Thanh Mẫn pôk pơ ư dôm jơnei hlôi jang đei lơ̆m sơnăm 2025 pơma hơdrô̆ păng pơđĭ jăl jang Quốc hội jăl XV. Tơlĕch jang tơdrong jang pơjei băl tơ̆ hơnô̆ hơnăp kơnh, Kơdră Quốc hội akhan, jăl jang Quốc hội jăl 16 tôch kơ trăp trĭn, athei hơnơ̆ng tơplih ‘nao đon tơchĕng pơjing khôi luơ̆t, bơ̆jang kiơ̆ dôm trong jang, dôm tơdrong pơtôch đơ̆ng Anih tơm Chĭnh trĭ, Ban Bí thư, vă mŭk drăm - tơpôl hơtŏk tơiung, vei sơđơ̆ng teh đak, pơjing khŭl jang chĭnh trĭ. Tơdrong hơgăt ăn hơtuch ‘noh jĭ hơtŏk ‘lơ̆ng tơdrong hơrih sa tơmam drăm păng jơhngơ̆m đon kơ kon pơlei.