Mă hơdăh ‘nŏh jĭ ưh kơmăh teh vă tuh ƀŭ tơ̆ tơdrong jang pơm trong tơter đak dơsĭ Vạn Ninh – Ninh Hòa kơjung dang 25 km, akŏm đĭ đăng jên jang hlŏh 2.000 ti. Tơdrong jang kăl đei dang 1,3 triu m3 teh vă tuh tơ̆ trong, mă lei yoa ưh kơmăh teh kơna tơdrong jang ‘nao jang đei lăp 30%.

Ƀok Trần Minh Chiến, Kơdră Anih vei lăng tơring jang mŭk drăm păng dôm tơring jang kơmăy kơ dêh char Khánh Hòa tơƀôh đon pơngơ̆t: “Trong tơter đak dơsĭ hrei ‘nâu ming man tôch mơmat yoa ưh kơmăh teh vă tuh ƀŭ tơ̆ trong. Ưh kơmăh teh jing ƀơm ưh ‘lơ̆ng truh tơdrong tơlĕch jên jang kơ teh đak. Truh âu kơnh, dôm tơring jang kơmăy vă tơlĕch tơdrong jang man anih jang, pơm trong oei tơƀâp tơhlăk tăk ‘năi. Kơtă đơ̆ng dang ei, bơngai tơmât jên jang tôch pơngơ̆t yoa ưh kơ đei teh vă tuh ƀŭ, ƀât mă lơ tơdrong jang oei ưh kơmăh teh vă tuh ƀŭ”.

Kiơ̆ Anih vei lăng choh jang xa păng cham char dêh char Khánh Hòa, dôm tơdrong jang tơ̆ dêh char Khánh Hòa oei kăl đei dang 6,3 triu m3 teh vă tuh ƀŭ păng 350.000 m3 tơmo vă ming man. Vă hơmet pơ ‘lơ̆ng tơdrong ưh kơmăh âu, dôm tơ ‘ngla tơmât jên jang oei chơ iŏk teh, tơmo rơkăh đơ̆ng pơm trong gre nai. Dang ei kơsô̆ teh, tơmo rơkăh đei mong akŏm dơ̆ng dang 3,3 triu m3.

Ƀok Phạm Văn Hòa, Phŏ Kơdră Anih vei lăng dôm tơdrong jang găh Choh jang xa păng pơm trong kơ dêh char Khánh Hòa ăn tơbăt, tơdrong chơ iŏk dơ̆ng teh, tơmo âu tôch gĭt kăl: “Tơdrong ‘nâu gô đei lơ tơdrong tôch đei yoa, yoa bơ̆n kơchăng hơmet đei tơmam ăn dôm tơdrong jang, tơjur ƀiơ̆ tơdrong tuh hŭt tơmam rơkăh. Yoa nhen thoi tơdrong jang Khánh Hòa - Buôn Ma Thuột kŭm tôch mơmat yoa ưh đei anih tuh teh. Tơdrong chơ iŏk teh pơyoa ăn tơdrong jang nai âu gô tơjur ƀiơ̆ lơ jên jang ăn 2 tơdrong jang”.

Tơdrong ưh kơmăh teh, tơmo, tơmam ming man tơ̆ Khánh Hòa đei yoa đơ̆ng tơdrong ‘mĕh vă tŏk lơ lơ̆m dôm tơdrong jang, tơdrong pơm hla ar kôch teh, phă tơmo păng hơtŏk kơsư̆k jang tơ̆ dôm anih sir, teh tơmo oei hiong lơ jơnăr. Vă hơmet pơ ‘lơ̆ng, hơdai hăm tơdrong chơ chuĕn tơmam teh, tơmo, dêh char Khánh Hòa oei hơlen năng dôm tơring đei tôm tơdrong ‘lơ̆ng vă kôch teh, tơmo, tơlĕch trong vei lăng tơmam teh tơmo lơ̆m trong jang kơ dêh char. Kŭm hăm ‘nŏh, lăng hơlen, kĭ ăn 1,2 anih jang ưh kăl pơgơ̆r rơih kơjă vă sir iŏk teh, tơmo chơ tuh ăn dôm tơdrong jang tih, gĭt kăl.

Ƀok Lê Huyền, Phŏ Kơdră vei lăng kon pơlei dêh char Khánh Hòa athei dôm tơ ‘ngla tơmât jên jang, anih roi tơƀôh kơchăng đơ̆ng tơdrong hơmet ăn tơdrong jang hloi, hơlen năng mă tôm anih chơ pơtruh teh, tơmo vă đei trong jang lăp ‘lơ̆ng, veh ver tơdrong tơhlăk mưh tơlĕch tơdrong jang: “Dôm anih vei lăng tơdrong jang athei kơchăng sek tơlang đei tơdrong, nhen: Tơdrong jang bơ̆n kăl đei tơmam kiơ? Tơ̆ yơ? Yă dôm yơ? Veh ver tơdrong tơmam kiơ 'nŏh pơma gơ̆h, mă lei apinh tơ̆ yơ păng dôm yơ 'nŏh ưh gơ̆h tơl. Tơdăh ưh đei pơma tơ̆ yơ 'nŏh ưh băt vă tơlĕch trong yơ vă pơjing, tơmât lơ̆m tơdrong jang, yoa dang 3km dăh mă 5 km đĕch sư đĭ pha băl bơih. Đơ̆ng noh jing ưh kơchăng hăm Anih vei lăng choh jang xa păng cham char vă chă anih sir iŏk, tơlĕch nơ̆r athei, chih tơmât lơ̆m tơdrong tơproh trong jang”.