Ƀât tŏk bŏk pơyan phang, lơ đak kuay, dơnâu đak tơ̆ xăh Ia Nan, dêh char Gia Lai hrơ̆ đĭ, pơm ăn kơhrĕng unh hnam kon pơlei ưh kơmăh đak yoa. Tơ̆ hơnăp tơdrong ‘nâu, Khul jang mŭk drăm – Vei sơđơ̆ng teh đak 72 (Binh đoàn 15) tơtom chơ pơtruh đak yoa, tơgŭm ăn kon pơlei tơ̆ xăh Ia Nan yak hlŏh pơmat tat kơplăh dang ei.

Ia Nan jĭ xăh sơlam, tơring arih xa kơ kon pơlei Jarai, tơdrong arih xa oei kơƀăh kơƀôch; hơdrô̆ plei Sơn đei 115 unh hnam hơnơ̆ng ưh kơmăh đak lơ̆m pơyan phang. Dôm năr âu ki, khul jang hơnơ̆ng pơgơ̆r đơ̆ng 3 truh 5 ‘măng gre chơ đak ăn kon pơlei lơ̆m rim năr, chơ ba dang 30 truh 40 m3 đak yoa ăn kon pơlei. Tơdrong chơ đak âu ưh lăp vang vei lăng năng tông tơdrong arih xa ăn kon pơlei đĕch mă oei tơƀôh hơdăh hơnăp jang, đon tơnăp đơ̆ng khul linh vang tơgŭm ăn kon pơlei tơ̆ tơring pơm kơđông oei, hơmet kơjăp tơdrong pơvei đơ̆ng linh hăm kon pơlei, mă loi tơ̆ tơring sơlam oei đei lơ tơdrong pơmat tat.