Ƀar ‘nu kơdră chĕp pơgơ̆r teh đak pơma tơbăt jơhngơ̆m đon chơt hơ iă tơ̆ hơnăp dôm tơdrong atŏk tơ iung kơtang tơgoăt tơgoăl Việt Nam - Ấn Độ đơ̆ng rŏng 10 sơnăm pơjing Jang hơdoi gĭt kăl Tôm tong. Ƀar păh drơ̆ng mĭnh nơ̆r lơ trong vă jang vă hơnơ̆ng pơm kơtang hloh dơ̆ng tơgoăt tơgoăl jang hơdoi lơ̆m rim tơdrong. Lơ̆m ou, jang hơdoi vei lăng sơđơ̆ng oteh đak-sơđơ̆ng tơring hơnơ̆ng đei sơkơ̆t hơdăh jĭ tơdrong kăl hloh. Găh tơdrong jang mŭk drăm, mơdro sa păng tơmơ̆t jên jang, ƀar teh đak drơ̆ng mĭnh nơ̆r pơjing rơvơn atok kơtang lơ̆m tơgoăt jang hơdoi tĕch răt, tơdrong đei yoa lơ̆m plei teh kiơ̆ trong vang jơnei, vang đei iŏk yoa kơjăp. Tổng Bí thư, Kơdră chĕp pơgơ̆r teh đak Tô Lâm sơkơ̆t hơdăh Việt Nam drơ̆ng nơ̆r atŏk kơtang răt tơmơ̆t tơmam drăm đơ̆ng Ấn Độ, adoi athei păh Ấn Độ roi năr roi hơmet pơ ‘lơ̆ng rim tơdrong tơchơ̆t pơkăp ‘lơ̆ng hăm tơmam drăm Việt Nam. Ƀar păh vang drơ̆ng mĭnh nơ̆r iŏk tơdrong jang khoa hŏk-kmăi kmŏk, tơplih ‘nao tơchăr păng tơplih kơsô̆ pơm hơyak pran kơtang ăn jăl atok tơ iung ‘nao kơ tơgoăt tơgoăl dih băl.