Lơ̆m noh, jang kiơ̆ tơdrong pơjei băl sut pơđĭ hnam hiăh hiok, kiơ̆ đơ̆ng krao hơvơn, mong akŏm jên hlôi man đei 12 tŏ hnam ‘nao, tơgŭm 160 năr jang, akŏm đĭ đăng đei kơjă hlŏh 800 triu hlak jên; pơgơ̆r kơhrĕng ‘măng năm jang Năr pơh rơgŏh, năr vang bơ̆jang pơjing tơring tơrang ‘nao sơng đei vă jê̆ 13.500 ‘nu đoàn viên, druh dăm vang jang.

‘Ngoăih kơ ‘nŏh, rim anih jang Đoan lơ̆m dêh char Lâm Đồng tơtom pơjing 137 khul druh dăm năm jang tơgŭm "Pơtho ăn kon pơlei găh kơmăy sô̆", tơgŭm ăn vă jê̆ 10.000 ‘nu kon pơlei hŏk, iŏk yoa kơmăy sô̆. Khul bơ̆ jang kơ Anih jang đoan dêh char Lâm Đồng ăn tơbăt, lơ̆m sơnăm 2025, vă pơgơ̆r tŏ sĕt hlŏh ‘nŏh 4 ‘măng năm bơ̆ jang vang pơjing tơring tơrang ‘nao păng Năr pơh rơgŏh, tơdrong jang đei pơgơ̆r kiơ̆ khei, tôch gĭt kăl.