Yak mơ̆t lơ̆m sơnăm hŏk ‘nao, dêh char Đắk Lắk tơchĕng hơdrol tơjur 51% kơsô̆ anih pơtho pơhrăm kơ teh đak đơ̆ng rŏng kơ proh hơmet ming dơ̆ng hnam trưng, lăm hŏk lơ̆m tơring. Trong jang âu đei Khŭl kơdră chĕp kơ̆l pơgơ̆r Anih jang Đảng dêh char Đắk Lắk ăn tơgop nơ̆r tơ̆ Hop akŏm ‘măng mă 27. Kiơ̆ kơ ‘noh, kơsô̆ hnam trưng mầm non jur đơ̆ng 356 jur oei pă 150 hnam trưng; jăl 1 đơ̆ng 450 jur 134 hnam trưng; Jăl 2 đơ̆ng 284 jur 92 hnam trưng. Lơ̆m kơplăh ‘noh, tơdrong jang hnam trưng 2 jăl 1 - jăl 2 tŏk bŏk đơ̆ng 63 tŏk 159 hnam trưng. Tơ̆ jăl 3, kơsô̆ hnam trưng tơchĕng hơdrol tơ jur 10 hnam trưng, jur oei pă 68 hnam trưng. Grŭp pơtho pơhrăm tơdrong jang - pơtho pơhrăm hơnơ̆ng kŭm đei proh hơmet đơ̆ng 24 jur oei pă 5 hơnih pơtho pơhrăm tơdrong jang - pơtho pơhrăm hơnơ̆ng păng 4 hnam trưng trung học tơdrong jang. Kiơ̆ kơ Bí thư Đảng dêh char Đắk Lắk Lương Nguyễn Minh Triết, tơdrong proh hơmet, tơmơ̆t hơdai hnam trưng hŏk ưh kơ đei ƀơm ưh kơ ‘lơ̆ng truh hŏk tro.

“Hơdrol ki kơdră vei lăng hnam trưng lăp vei lăng 1 hnam trưmng đĕch, dang ei đei 5 hơnih hŏk đei 5 hnam hŏk ‘noh jơ ‘năr tơ jur pơtho tơ̆ dôm hnam trưng thoi yơ vă hơmet pơ ‘lơ̆ng tơdrong ưh kơ măh thây kô pơhto. Thây kô pơtho gô năm pơtho tơ̆ dôm hnam hŏk lơ̆m atŭm 1 hnam trưng kơ 1 xăh ‘noh athei hơmet ăn thoi yơ vă kơ trŏ lăp, ‘noh tơdrong tơroi âu ‘noh jĭ tơdrong kĕ jang tơnăp, klăih song kơchư̆k jang, kơchư̆k chĕp kơ̆l păng tơdrong kĕ vei lăng đơ̆ng kơdră vei lăng hnam trưng”.

Yak mơ̆t lơ̆m sơnăm hok ‘nao, dêh char Lâm Đồng tơjur pă 825 hnam trương teh đak. Tơdrong hơmet ming dơ̆ng hnam trương teh đak đei iung jang trŏ lăp hăm măt bơngai kon pơlei, tơring kon pơlei oei păng tơdrong 'meh vă vei lăng ‘nao. Trong iung jang proh hơmet hnam trương mâm non, jăl ƀar pêng, hnam trương pơtho pơhrăm thương xuyên teh đak kơ dêh char Lâm Đồng iŏk đei drơ̆ng nơ̆r kơtang đơ̆ng khul chĕp pơgơ̆r. Kô pơtho Phạm Thị Ngọc Bích, Kơdră chĕp pơgơ̆r hnam trương Mầm non Đạ Tông, tơring tơnap tap hloh Đam Rông 4, tơbăt, Khul kơdră chĕp pơgơ̆r hnam trương drơ̆ng mĭnh nơ̆r kơtang hăm trong jang hơgrop Hnam trương Mầm non Đạ Tông hăm hnam trương Mầm non Đạ Long: “Trong jang hơgrop jĭ trong iung jang đơ̆ng pơđĭ khul chep pơgơ̆r adoi nhen lĕ ba ‘noh proh hơmet đơ̆ng Kơdră chĕp pơgơ̆r jing pơm Kơ iĕng Kơdră chĕp pơgơ̆r dăh mă pơm kô pơtho ‘noh nhôn jei oei sơđơ̆ng jơhngơm bơ̆ jang ưh kơ đei tơdrong kiơ ôh. Đơ̆ng mă ‘nao lĕch đơ̆ng hnam trương jĭ đĭ oei tơ̆ ou bơih kơna tơdrong tơklep adoi nhen jơhngơm đon ‘mêm kơ eng kơ đe hŏk tro jĭ tôch kơtang. Kơna tơdrong mă jang kơchư̆k ou dăh mă jang kơchư̆k yă kiơ jei hoei pơm kơnê̆ ou to ôh. Dôm tơdrong jei pơvih pơvăn ăn bơ̆ jang vei lăng năng tông, pơtho pơhrăm ăn mâm non”.

Sơnăm hŏk 2026-2027 tŏk bŏk vă jê̆ truh. Lơ̆m lơ kơsô̆ jên athei hiơ̆k bơngơ̆t ăn kơ kon oh hơdrol kơ năr mơ̆t hŏk blŭng, hla ar hŏk rŏ lăng ưh kơ sĭ kơsô̆ jên lơ. Mă lei, hăm unh hnam iŏk yua tŏ sĕt, kon lơ năm hŏk dăh mă đei tơdrong hơrih sa mơmat tat, ‘nâu oei jing 1 kơsô̆ jên kăl kơ tơroi. Yua thoi noh, tơlĕch ăn đơ̆ng Anih vei lăng kon pơlei dêh char Gia Lai găh trong jang kiơ̆ tơdrong tơgŭm asong đĕch hla ar hŏk ăn kơ hŏk tro găh dôm grŭp tơgŭm hơdrol lơ̆m dêh char đei tơdrong ‘lơ̆ng hơdăh păng ‘mêm mơnat. Gia Lai tơchĕng hơdrol đei hloh 180.000 hŏk tro phô thŏng găh bơngai đei sa yua tơdrong tơgŭm, hăm akŏm jên hloh 42 ti hlak jên.

Hơdai hăm tơdrong ưh pă bơngơ̆t kơ hla ar hŏk ăn kơ kon oh, đon chhôk hơiă tih hloh đơ̆ng kon pơlei plei Kon Sơ Lăl, xăh Ia Khươl, dêh char Gia Lai ‘noh jĭ hnam trưng ‘nao ‘lơ̆ng, rơgoh đei man hloi jê̆ hnam. Đe oh hŏk tro ưh pă athei krŏng măng iung hrôih, ưh pă hli tơtăm kơ đei đak loh jroh mưh rim pơyan ‘mi kial hơbŭt truh. Trong năm truh tơ̆ hnam trưng dang ei lăp hiong 2,3 pơnĭt năm jơ̆ng hoh hiôk. ‘Nhŏng Wat, 38 sơnăm, plei Kon Sơ Lăl, xăh Ia Khươl, tơroi:

“Ƀơ̆t oei tơ̆ plei so, nhôn năm hŏk athei năm đơ̆ng 5 jơ pơge ‘noh mă tom jơ mơ̆t hŏk. Dang ei hnam trưng jê̆ pơlei, tôch kơ hiôk. Mă đơ̆ng oei mơmat tat, mă lei gô hơdrin vei lăng ăn 2 ‘nu năm hŏk. Sơnăm hŏk ‘nao âu, răt kơ đe kon hơbăn ao ‘nao, klang tap ‘nao, hla ar hŏk tôm vă năm hŏk, vă kon hơ ‘lơ̆p gơh đŏk gơh chih, ‘meh tơdrong hơrih đe sư đơ̆ng rŏng âu dă ƀiơ̆ kơ gleh hrat, mơmat tat ƀiơ̆. Bơnê kơ Đảng, Teh đak hlôi bơngơ̆t truh ăn kơ nhôn rim tơdrong”.

Hơnih jang pơtho pơhrăm dêh char Lâm Đồng hlôi keh đang tơdrong jang hơmet ăn 2 hnam trưng hŏk jăl kơđeh păng Trung học cơ sở xah  Quảng Trực păng xah Thuận An iŏk yua kơtă lơ̆m sơnăm hŏk mă blŭng kơ sơnăm 2026-2027. Ƀar hnam trưng đei pơjao iŏk pơtho 60 lăm hŏk hăm 1.770 hŏk tro, đơ̆ng lăm 1 truh lăm 1 truh lăm 9. Lơ̆m noh, hnam trưng jăl kơđeh păng Trung học cơ sở teh đak rong 'me Thuận An pơtho 30 lăm hăm 870 hŏk tro; hnam trưng jăl kơđeh păng Trung học cơ sở teh đak rong 'me Quảng Trực pơtho 30 lăm hăm 900 hŏk tro. Ƀar hnam trưng đei iŏk yua lơ̆m sơnăm hŏk 2026-2027 hlôi pơm trong hiôk vă hŏk tro tơring sơlam, mă kăl noh hŏk tro kon kông gơh hŏk pơhrăm lơ̆m hnam trưng sơđơ̆ng 'lơ̆ng hloh. Kiơ̆ đơ̆ng noh, dôm tơdrong ming man ưh hơdrô̆ tơgop hơtŏk 'lơ̆ng tơdrong pơtho pơhrăm mă brư̆ brư̆ keh đang tơchơ̆t hơtŏk pơtho pơhrăm tơ̆ tơring sơlam kơ dêh char.

Anih vei lăng kon pơlei dêh char Đắk Lắk tơlĕch ăn trong vă jang pơgơ̆r Lêh mơ̆t hŏk blŭng sơnăm hŏk 2026 - 2027 păng lêh et hơtŏk dôm hnam trưng hŏk teh đak rong tơ̆ dôm xăh sơlam tơ̆ groi kông lơ̆m dêh char  Đắk Lắk. Kiơ̆ trong tơlĕch jang, Lêh pơgơ̆r mơ̆t hŏk blŭng sơnăm hŏk 2026 - 2027 gô đei pơgơ̆r hrơ̆ch lơ̆m pgê 5/9/2026. Lơ̆m noh, dêh char pơgơ̆r lêh et hơtŏk dôm hnam trưng hŏk teh đak rong tơ̆ dôm xăh Buôn Đôn, Ia Lốp, Ia Rvê păng Ea Rốk. Hơnih pơdăh tivi tơm kơ dêh char đei ‘măn tơ̆ Hnam trưng hŏk teh đak rong Jăl 1 păng jăl 2 Buôn Đôn, pơih kơtă hăm hơnih pơdăh ti vi Hơnih kơdrơ̆m tơ̆ Hnam trưng hŏk teh đak rong Mường Khương, xăh Mường Khương, dêh char Lào Cai. Tơdrong pơgơ̆r Lêh mơ̆t hŏk blŭng păng et hơtŏk dôm hnam trưng teh đak rong vă pơm tơdrong chơt hơiă, ‘nă hal, tơƀôh jơhngơ̆m hơiă ăn khŭl thây kô pơtho, kang ƀô̆ vei lăng pơtho pơhrăm păng hŏk tro yak mơ̆t lơ̆m sơnăm hŏk ‘nao.

Hơnih jang vei lăng kon pơlei dêh char Quảng Ngãi tơlĕch tơchơ̆t pơtơm sơnăm hŏk 2026-2027 atŭm hăm Lêh et hơtŏk hnam trưng dôm jăl hŏk teh đak rong 'me tơ̆ dôm xah sơlam teh. Kiơ̆ tơlĕch jang, pơgê năr  5/9, dêh char gô pơgơ̆r et hơtŏk 4 hnam trưng teh đak rong 'me tơ̆ xah  Dục Nông, Sa Loong, Rờ Kơi păng Mô Rai. Hơnih tơm pơgơ̆r đei pơkăp ah Hnam trưng Jăl kơđeh  - Trung học cơ sở teh đak rong 'me xah Dục Nông, pơdah trực tuyến hăm tơdrong pơtơm sơnăm hŏk kơ jơ̆p teh đak, dôm hơnih nai adoi đei chô̆ pơdah trực tuyến. Lêh pơtơm sơnăm hŏk 'nao păng et hơtŏk hnam trưng 'nao tơ̆ tơring sơlam vă pơm trong hiôk ăn sơnăm hŏk 'nao,  sơkơ̆t hơdah tơdrong tơgŭm đơ̆ng Đảng, Teh đak hăm tơdrong pơtho pơhrăm tơ̆ tơring kon kông păng groi kông, tơring sơlam. Tơgop hơtŏk tơdrong hiôk ăn hŏk pơhrăm ăn hŏk tro tơring tơnap tap.