Akŏm jên tĕch tơmam tơ̆ teh đak ‘măng mă blŭng đei hloh 1.000 ti USD. Jên tơmơ̆t jang kơtă teh đak đe pơm hla ar đei dang 55 ti USD, thu mong jên ăn teh đak đei 2,44 triệu ti hlak jên. Kăl kơ lăng truh, hloh 900 tơdrong jang oei đei hlôi đei tơmơ̆t lơ̆m iŏk yua. Pơtôch ‘măng hop akŏm, Thủ tướng Lê Minh Hưng pơma hơdăh, vei lăng hơtŏk kơjă lơ, vei kơjăp sơđơ̆ng mŭk drăm tih ‘noh jĭ hơnăp jang gĭt kăl hloh lơ̆m 2 khei hơtuch sơnăm, pơm ‘lơ̆ng ăn jang tŏk kơjăp păng vei sơđơ̆ng tơdrong hơrih sa tơpôl.

Thủ tướng athei dôm anih tơm, anih jang, tơring hơdrin tơlĕch jên jang 100% trong tơlĕch jên tơmơ̆t jang kơ teh đak, hơmet pơ ‘lơ̆ng mơmat tat ăn dôm tơdrong jang hiơ̆, hơmet ‘lơ̆ng tơdrong tơhlăk găh hnam teh đak, hơnih bơ̆jang teh đak păng teh tơpôl. Hơdai hăm ‘noh tŭn pran tĕch tơ̆ teh đak đe, pơtrŭt răt yua lơ̆m teh đak, tơgoăt tĕch mơdro păng pơtrŭt mơdro sa, tơgop bơ̆jang kiơ̆ tơdrong hơgăt tŏk mŭk drăm pơđĭ sơnăm.