Năr (05/08), tơ̆ Hà Nội, Thủ tướng teh đak bơ̆n Phạm Minh Chính năm Hop akŏm bơngai tang măt ăn Đảng ƀô̆ Anih tơm Ming man 'măng mă mônh, jăl jang 2025-2030. Hăm pơkăp "Tơguăt – Hiôk hian – Trŏ tơchơ̆t – Hơtŏk – Tơ-iung",  Đảng ƀô̆ Anih tơm Ming man jăl jang 2025-2030 sơkơ̆t hơdah 6 sơnong jang tơm; 3 tơdrong hơtŏk jang lơ̆m tơlĕch ming man, tơring kơdrơ̆m păng hnam oei tơpôl; Keh đang tơchơ̆t truh sơnăm 2030 jơ̆p teh đak đei 5.000 km trong kơdou hrenh; Hơlen pơtoi tơroh dôm tơdrong chơ tơmam drăm, mă kăl noh dơnŏk duk lơ̆m teh đak hăm trong gre treng, trong teh; Hơtŏk keh đang tơchơ̆t 1 triu tŏ hnam oei tơpôl truh sơnăm 2030 kiơ̆ Tơchơ̆t đơ̆ng Jơnŭm pơgơ̆r teh đak...

Tơroi hơdah gah dôm ƀai hŏk kăp gĭt, Thủ tướng ră hơdah gah ƀai hŏk tơguăt tơguăl, tơjră hơbĕch hơbal hăm tơdrong đei ƀôh păng hơtŏk asong sơnong pơgơ̆r năm hơdoi hăm chă hơlen dăr lăng. Thủ tướng akhan, tơ̆ anăp ah hơtuch sơnăm 2025, athei keh đang 3.000 km jăl trong kơdou hrenh; hơdrin keh đang trong tơjih đak dơsĭ kiơ̆ pơkăp. Thủ tướng adoi pơgơ̆r, lăng tơgĭt gah tơdrong pơm kiơ̆ trong jang kơmăi kơmŏk 'nao, akŏm bơngai jang pơm trong gre treng păng trong gre treng kơdou hrenh. Hơtŏk tenh pơ-'lơ̆ng kơjăp tơring kơdrơ̆m; hơtŏk tơring kơdrơ̆m kiơ̆ trong 'nao, tơring kơdrơ̆m jơk, gơh hơgei, pơtrŏ hăm tŏ 'mi kial tơplih hrei ou...