Khei ‘năr âu ki, Quốc hội hlôi tơlĕch ăn dôm Tơdrong tơchơ̆t găh trong jang tơmơ̆t jên jang pơm trong gre treng kơdâu hrĕnh tơ̆ trong Bắc -Nam; Tơdrong tơchơ̆t găh trong jang tơmơ̆t jên jang pơm trong gre treng Lào Cai - Hà Nội - Hải Phòng păng Tơdrong tơchơ̆t găh pơlong lăng 1,2 trong jang tơgŭm hơdrô̆, gĭt kăl vă hơtŏk tơiung tơdrong jang trong gre treng anih kơdrơ̆m tơ̆ pơlei tơm Hà Nội, pơlei tơm Hồ Chí Minh.

Tơ̆ hơnăp kơnh, Thủ tướng Phạm Minh Chính akhan hơnăp jang đơ̆ng Anih pơgơ̆r jang ‘noh jĭ tôch kơ trăp trĭn, gĭt kăl, athei dôm bơngai jang lơ̆m Anih pơgơ̆r jang hơnơ̆ng hơtŏk jơhngơ̆m đon, jang tơnăp ‘lơ̆ng. Thủ tướng athei dôm kơdră đảng, kơdră chĕp kơ̆l tơring tơlĕch jang tơdrong jang iŏk pơ ‘ngoăih teh, pôk rĭ anih jang kăl ki thuơ̆t; lơ̆m noh tôch kơ bơngơ̆t truh tơdrong jang ăn oei tơ̆ plei hle, tơgŭm sơđơ̆ng jang sa vă kon pơlei đei hơnih oei, bơ̆jang păng jang sa ‘nao tŏ sĕt hloh dăh mă ‘lơ̆ng hloh hơnih so.