Pơma tơ̆ ‘măng hop akŏm, Thủ tướng Phạm Minh Chính roi tơbăt, âu ki, Khŭl kơdră teh đak hlôi băt hơdăh tơdrong hơgăt jang tŏk GDP sơnăm 2025 đơ̆ng 8,3-8,5% hăm tơdrong tŏk hrĕnh, tŏk lơ mă lei athei kơjăp; lơ̆m noh hơtŏk tơiung khoa hŏk kơmăy kơmŏk, tơplih ‘nao hơgei, tơplih kơsô̆ ‘noh jĭ 1 trong jang gĭt kăl. Thủ tướng athei băt hơdăh dôm hơnăp jang păng tơmam hơdăh đơ̆ng dôm anih tơm, anih jang, tơring lơ̆m khei 7, jăl khei III păng dôm khei hơtuch sơnăm.

 Lơ̆m noh, rơih rim tơdrong pơjing hla ar chih răk, mă loi ‘noh jĭ hla ar chih răk găh vei lăng teh. Thủ tướng pơjao kơ Anih tơm vei lăng Jên hu hơmet ăn tôm jên jang teh đak vei sơđơ̆ng jên jang păng bơngai jang bơ̆jang kiơ̆ jơnei đơ̆ng rim tơdrong jang, trong tơlĕch jang; lơ̆m noh, athei tơmơ̆t jên jang ƀlep tơdrong, đei yua, ƀlep tơdrong tơm.