Dang ei Grŭp jang Marubeni tơmơ̆t jên jang lơ̆m tơdrong jang hơyuh ŭnh điên ngar, tĕch tơlĕch tơ̆ teh đak dôm tơmam đơ̆ng  Việt Nam. Thủ tướng Phạm Minh Chính hôn bơnê ƀơ̆t Marubeni rơih Việt Nam ‘noh jĭ hơnih gĭt kăl hơtŏk tơiung tơ̆ tơring Đông Nam Á, akhan tơdrong ‘nâu trŏ lăp hăm trong jang hơtŏk tơiung jang tơbôl đơ̆ng Việt Nam, mă loi ‘noh jĭ sơng đei tơmơ̆t jên jang đơ̆ng dôm anih mơdro sa Nhật Bản.

Thủ tướng ‘meh Marubeni hơnơ̆ng pơih să dôm hnam kơmăy ŭnh hơyuh; hơdai hăm ‘noh, jang hơdai hăm Grŭp jang Petrovietnam lơ̆m tơdrong jang ŭnh điên kial tơ̆ đak dơsĭ vă tĕch tơlĕch ŭnh điên ăn kơ dôm teh đak ASEAN. Thủ tướng kŭm ‘meh vă Marubeni tơgŭm vă cheh phe păng phe Việt Nam tĕch lơ tơ̆ anih tĕch mơdro Nhật Bản kŭm nhen anih tĕch mơdro apŭng plĕnh teh; Nhật Bản gơh hơtŏk loi dơ̆ng răt tơmơ̆t phe ƀa, tơmam sa, plei ‘long đơ̆ng Việt Nam.