Pơma tơ̆ jơ tơƀơ̆p muh măt, asong tơmam ăn dôm Khŭl tơchă, iŏk akŏm kơting lĭnh lôch tang ăn teh đak kơ Quân khu 9, Thủ tướng Phạm Minh Chính pơma hơdăh Đảng, teh đak gô hơnơ̆ng jang đĭ jơhngơ̆m, hơvơn pơđĭ hloi khŭl jang chĭnh trĭ păng đĭ đăng lơ̆m tơpôl vă bơ̆jang kiơ̆ đei yua hloh dơ̆ng tơdrong jang tơchă, iŏk akŏm păng băt hơdăh hơnăn lĭnh lôch tang ăn teh đak, vă “hoei kơ đei 1 ‘nu lĭnh lôch tang ăn teh đak hơyơ đei hiơ̆t hơchăng, ưh kơ đei 1 ŭnh hnam lĭnh lôch tang ăn teh đak hơyơ athei răp gô  hơ ngol”.

Thủ tướng ‘meh vă păng lui ngeh hăm tơdrong joăt ‘mêm mơnat gĭt kăl, jơhngơ̆m đon băt “nhă đak ƀlŏk kơ tu”, “sa plei ƀlŏk kơ bơngai pơtăm ‘long”, hăm đon hơdrin ‘lơ̆ng păng tơdrong tơgŭm đơ̆ng đĭ đăng Đảng, đĭ đăng kon pơlei, đĭ đăng lĭnh bơ̆n, tơ̆ hơnăp kơnh, khŭl lĭnh tơchă, iŏk akŏm kơting lĭnh lôch tang ăn teh đak gô hơnơ̆ng hơtŏk jơhngơ̆m đon jang tơnăp păng dôm tơdrong hlôh vao hlôi đei, hơdrin yak hloh rim tơdrong pơmat tat, long nol vă jang đang hơgei hloh hơnăp jang đei pơjao; tơgop pơm dă ƀiơ̆ ơh sơ ‘ngon đơ̆ng tơblăh vang, jang ƀlep hơnăp jang hăm dôm bơngai đĭ lôch hơchăng yua kơ tơdrong rơngei, hiôk hian kơ Teh đak.