Hơnơ̆ng dôm tơdrong jang lơ̆m jơ năr năm ngôi, bơ̆jang tơ̆ teh đak Hàn Quốc, kơsơ̆ ‘năr 11/8, tơ̆ anih tơm Seoul, Tổng Bí thư Tô Lâm hlôi đei ‘măng pơma dơnuh hăm Thủ tướng Hàn Quốc Kim Min Seok.Tơ̆ jơ pơma dơnuh, Tổng Bí thư Tô Lâm pơma hơdăh Việt Nam ling lang lăng kăl tơdrong pơvei jang hơdai hăm Hàn Quốc păng ‘meh vă kŭm hăm Hàn Quốc pơm ‘lơ̆ng hloh dơ̆ng tơdrong pơvei Jang hơdai gĭt kăl tôm tơdrong Việt Nam - Hàn Quốc. 

Tổng Bí thư Tô Lâm athei 2 păh hơdrin pơm tơdrong tơklep hơdai kơjăp, đunh đai đơ̆ng 2 teh đak; hôn bơnê 2 păh hlôi kĭ pơdui đunh Hla ar chih tơƀlŏk găh tơdrong jang asong ăn bơngai jang teh đak đe đơ̆ng Việt Nam păng Hàn Quốc; hơtŏk loi dơ̆ng jang hơdai pơtho pơhrăm, athei Hàn Quốc tơgŭm pơtho bơngai jang ‘lơ̆ng nhen bán dẫn, gre điện, kơmăy kơmŏk sinh học, kơmăy kơmŏk pơm duk, kơmăy gơh hơgei. Thủ tướng Kim Min Sớc pơma hơdăh gô hơnơ̆ng bơngơ̆t truh jang hơdai hăm Việt Nam hơtŏk loi dơ̆ng pơtho pơhrăm bơngai jang ‘lơ̆ng pơyua ăn tơdrong hơtŏk tơiung mŭk drăm 2 teh đak tơ̆ hơnăp kơnh.