Sơng iŏk nơ̆r krao hơvơn đơ̆ng Ƀok Kơdră tơm teh đak Hàn Quốc Lee Jae Myung, Tổng Bí thư Tô Lâm hăm hơkăn ƀok atŭm hăm Kơdră kơpal teh đak bơ̆n iung năm tơmang teh đak Hàn Quốc đơ̆ng năr 10-13/8, pơgê năr 11/8, kiơ̆ jơ teh đak ou tơ̆ Hơnih hơnơ̆m Ƀok kơdră tơm, Ƀok kơdră tơm Lee Jae Myung pơm tơm pơm lêh sơng Tổng Bí thư Tô Lâm kiơ̆ trong pơgơ̆r kăl hloh. Lăp đơ̆ng rŏng pơm lêh sơng 2 ‘nu kơdră pơm tơm khul kơdră tang măt ƀar teh đak pơgơ̆r pơma đam vă tơlĕch dôm trong jang kăl vă hơnơ̆ng vei kơjăp păng atŏk tơ iung hloh dơ̆ng tơgoăt tơgoăl Jang hơdoi gĭt kăl tôm tong Việt Nam-Hàn Quốc lơ̆m khei năr kơnh. Iung pơma tơ̆ pơma đam, Tổng Bí thư Tô Lâm sơkơ̆t hơdăh: Tôch chơt hơ iă păng bơnê kơ Ƀok kơdră tơm hlôi ‘măn tơdrong kăl krao hơvơn Tổng Bí thư ‘noh teh đak tơmoi mă blŭng đơ̆ng rŏng Hàn Quốc đei khul kơdră chĕp pơgơ̆r ‘nao, tơƀôh hơdăh jơhngơ̆m đon lăng kăl hloh đơ̆ng Teh đak Hàn Quốc păng đơ̆ng kơ dih Ƀok kơdră tơm hăm tơdrong tơgoăt tơgoăl ƀar teh đak. Ƀok kơdră tơm Hàn Quốc Lee Jae Myung sơkơ̆t hơdăh, hăm trong chĕp pơgơ̆r gơh hơgei đơ̆ng Tổng Bí thư Tô Lâm, Việt Nam hrei ou tŏk bŏk atŏk tơ iung mŭk drăm tĕnh koăng, Ƀok kơdră tơm Hàn Quốc lui akhan, lơ̆m khei ‘năr kơnh Việt Nam gô jing mĭnh teh đak atŏk tơ iung jang sa iŏk đei lơ.