Trong pơjing Hla bơar tơbăt bơ̆ jang chinh trĭ tơlĕch ăn rim tơdrong pơkăp mŭk drăm git kăl kơ dêh char Dak Lăk lơ̆m jăl jang 2025-2030. Mă hơdăh ‘noh tơdrong tŏk mŭk drăm đơ̆ng 11,5% lơ̆m sơnăm năm tơ̆ lơ; jang sa iŏk đei măt bơngai sơnăm 2030 đei 160 triu hlak jên; choh jang sa tŏk 6,84% lơ̆m sơnăm; jang kmăi kmŏk pơm tơlĕch tơmam drăm-tơ iung pơjing ming man tŏk 18,1%; tĕch mơdro tŏk 11,25%.

Tơgop nơ̆r tơ̆ hop akŏm, ƀok Đào Tấn Lộc, Ƀĭ thư so Hơnih Đảng dêh char Phú Yên akhan, mĭnh lơ̆m dôm trong tơlĕch ăn oei lơ pơtêng hăm yan ou, mă kăl lơ̆m khei ‘năr dang ei:“Tŏk mŭk drăm choh jang sa 6,84% kiơ̆ kơ ĭnh lơ loh ‘noh lơ dêh hnang, kơ yuơ hui đei tơlĕch ăn lơ lou, hloh dơ̆ng choh jang sa ‘noh hăp gơnang lơ̆m tŏ ‘mi kial păng hơnih tĕch răt, bơ̆n dang ei tim mă hơmet kĕ 2 tơdrong ou kơna kăl hơlen mă brĕ. Đơ̆ng noh tŏk tơmam drăm kmăk kmŏk pơm tơlĕch tơ iung pơjing ming man ‘noh 18,1% jei tôch kơ lơ mơ̆n. Tơdăh hơdrin tơ iung pơjing ming man lei kĕ jơnei, mă lei jang kmăi kmŏk ‘noh hăp gơnang lơ̆m kon jên tơmơ̆t jang tơpôl.”

Hôn bơnê kơtang bơ̆ jang hơmet ăn đơ̆ng Hơnih bơ̆ jang chih tơlĕch hla bơar bơ̆ jang, ƀok Cao Đức Khiêm, sơ̆ jang Kơ iĕng Kơdră chĕp pơgơ̆r Đảng dêh char Dak Lăk, drơ̆ng kiơ̆ lơ̆m 17 trong tơlĕch jang, 5 khul tơdrong jang păng 3 tơdrong jang kăl. Mă lei, ƀok pơma hơdăh dơ̆ng kăl atŏk kơtang tơ iung pơjing khul jang gơh hơgei:“Ĭnh ƀôh bơ̆n ‘nao lăp lăng kơjăp lơ̆m khul kang ƀô̆ chĕp pơgơ̆r tim mă lăng hơlen truh lơ khul bơ̆ jang ‘noh kih sư, kŏng nhân kih thuơ̆t jang hơgei vă băt hơdăh găh kon jên tơmơ̆t jang FDI. Mă ƀar ‘noh hnam kmăi kmŏk ou to, nhen lĕ oei iĕ ioch, kơna kăl tơmơ̆t dơ̆ng lơ̆m trong pơprŏ vă jang kơ dêh char Dak Lăk dôm hơnih jang kmăi kmŏk pơm tơlĕch tơmam drăm, hơnih kmăi kmŏk gơh hơgei vă iung jang jơnei ‘lơ̆ng hơ iă hloh dơ̆ng.”

Hop akŏm đei 11 nơ̆r tơgop, đei 5 nơ̆r chih tơgop păng 6 nơ̆r tơgop kơtă. Tơgoăt iŏk dôm nơ̆r tơgop tơ̆ hop akom Nguyễn Đình Trung, Kơdră jang lơ̆m Trung ương Đảng, Bí thư Đảng dêh char, Kơdră chĕp pơgơ̆r Hơnih pơm tơlĕch dôm Tơdrong tơchơ̆t Hop akŏm Đang ƀô̆ dêh char Dak Lăk ‘măng mă XVIII tơbăt, hơnih ou gô hơnơ̆ng tơgoăt iŏk hơlen kơtang dôm nơ̆r tơgop:“Nhôn gô tơgoăt iŏk kơtang păng tơlĕch jang hloi lơ̆m dôm tơdrong hơdăh mưh tơlĕch jang kiơ̆ Tơdrong tơchơ̆t Hop akŏm tih, dăh mă tơgŭm ăn bơ̆ jang chĕp pơgơ̆r kơ khul kơdră Đảng, kơ Jơnŭm vei lăng kon pơlei, Hơnih vei lăng kon pơlei vă tơlĕch jang kiơ̆ dôm tơdrong jang kơ Dak Lăk ‘lơ̆ng hơ iă hloh dơ̆ng. Đơ̆ng rŏng hop akŏm ou dêh char jei lăng kơjăp hơnơ̆ng sơng iŏk nơ̆r tơgop đơ̆ng rim bơngai tang măt păng nhôn tôch ‘meh vă sơng iŏk đei nơ̆r tơgop”.