Hăm hơnăn: "Pơjei băl tŏk hrĕnh, ‘lơ̆ng pơjing khŭl lĭnh Kŏng an kon pơlei tơpă rơgoh, pran kơjăp, chính quy, gơh hơgei, ‘nao”, Hop akŏm Pơjei băl “Yua kơ tơdrong sơđơ̆ng Teh đak” ‘măng mă 9 yua đơ̆ng Anih tơm vei lăng Kŏng an pơgơ̆r kơmăng (6/8), tơ̆ Hà Nội. 246 ‘nu bơngai hơgei ‘lơ̆ng, tang măt ăn kơ rơbâu bơngai jang ‘lơ̆ng, rơbăn ‘nu “bơngai ‘lơ̆ng, tơdrong ‘lơ̆ng” lơ̆m Tơdrong jang Pơjei băl “Yua kơ tơdrong sơđơ̆ng Teh đak” păng Tơdrong jang “Đĭ đăng kon pơlei vei lăng sơđơ̆ng teh đak”, Khŭl lĭnh kon pơlei nuih mơng păng dôm khul lĭnh pơjei băl lơ̆m teh đak vang truh Hop akŏm. Pơma tơ̆ Hop akŏm, Thủ tướng Phạm Minh Chính pơma hơdăh, dôm jơnei, iŏk đei hơdăh đơ̆ng khŭl lĭnh kŏng an kon pơlei hlôi tơgop gĭt kăl vei sơđơ̆ng chĭnh trĭ, pơjing tơpôl roi ‘năr roi hơgei, sơđơ̆ng, hiôk ‘lơ̆ng, tơdrong hơrih sa kơ Kon pơlei sơđơ̆ng, hiôk chơt, phĭ tơnŏ, pơm hơnih hiôk ‘lơ̆ng ăn hơtŏk tơiung teh đak.

Hăm lơ tơdrong jang, pơcheh hơiă, Tơdrong jang pơjei băl “Yua kơ tơdrong sơđơ̆ng Teh đak” hlôi pơtrŭt pran kơtang tơdrong tơplih ‘nao, pơcheh hơgei, tơlĕch jang dôm trong jang vei sơđơ̆ng ‘lơ̆ng, đei yua; tơgop jang pơkeh tơdrong jang vei lăng sơđơ̆ng; pơtrŭt tơdrong vang jang jơ̆p jang, ‘lơ̆ng đơ̆ng khŭl jang chĭnh trĭ, kon pơlei lơ̆m vei lăng teh đak. Thủ tướng athei khŭl lĭnh Kŏng an kon pơlei hơnơ̆ng hơtŏk tơdrong joăt joe, pôm nơ̆r ƀơ̆r đon, pơjei băl bơ̆jang kiơ̆ ‘lơ̆ng hơnăp jang pơjing tơdrong sơđơ̆ng lơ̆m kon pơlei, vei kơjăp tơdrong sơđơ̆ng lơ̆m kon pơlei tơklep hăm jơhngơ̆m đon kon pơlei kơjăp; vei sơđơ̆ng chĭnh trĭ, sơđơ̆ng tơpôl, vei lăng hơnih rơngei, sơđơ̆ng vă hơtŏk tơiung teh đak.