Tơ̆ tơring pơjing Plei hle Điểm 9, xăh Ia Hiao, dang 70 tŏ hnam mă blŭng oei hăt pơm pơkeh. Linh so Nay Kêr tơ̆ plei Chư Plah Jai, 1 lơ̆m dôm unh hnam mă blŭng pôk hnam đơ̆ng plei so tŏk tơ̆ âu, chơt hơiă pơma: “Adrol sơ̆, arih tơ̆ anih hơnơ̆ng đei đak lơ̆p, tơƀâp lơ pơmat tat păng krê hơmơt, mă loi lơ̆m pơyan ‘mi. Dang ei đei teh đak pơngơ̆t, tơgŭm pơjing anih oei xa ‘nao, pôk hnam tŏk oei tơ̆ tơring kông, sơđơ̆ng ‘lơ̆ng ƀiơ̆, kon pơlei tôch hơiă păng hơđơ̆ng jơhngâm. ‘Nâu jĭ tơdrong ‘lơ̆ng vă mih ma duch nă gơ̆h đei tơdrong arih xa sơđơ̆ng, jang tŏk mŭk drăm păng dar deh pơm hơtŏk tơdrong arih xa. Nhôn tôch bơnê kơ Khul kơdră pơgơ̆r tơring hơnơ̆ng pơngơ̆t truh, chă trong tơgŭm ăn kon pơlei nhôn.”

Hăm kon pơlei Jarai, tơplih ming anih oei xa ưh lăp tơplih pơlei đĕch mă oei đei hloi đon pơngơ̆t, đon ‘mĕh vă chĕp vei tơdrong juăt, vei lăng đak hơdrơ̆m. Gơnơm adrin roi tơbăt, tơdrong vang yak hơdoi đơ̆ng Khul chĕp kơ̆l Đảng, Khul kơdră pơgơ̆r tơring, mă kon chu, hơđơ̆ng jơhngâm mưh dôm tơdrong juăt, kơjă kăp gĭt đơ̆ng joh ayŏ kơ dŏ xoang, tơdrong tôn chĭng chêng, tanh brai vai khăn oei đei hơnơ̆ng chĕp vei tơ̆ plei hle.

Yă Ksor H’Hoa – Phó Bí thư Chi bộ, pơm hloi Bơngai pơgơ̆r plei Chư Plah Jai, xăh Ia Hiao tơroi: “Mưh mih ma duch nă pôk hnam tŏk oei tơ̆ plei hle, dôm tơdrong juăt, jŏh ayŏ kơ dŏ xoang ‘lơ̆ng đơ̆ng sơ̆ kơ bơngai Jrai oei hơnơ̆ng đei chĕp vei păng tưk tơiung. Đơ̆ng dôm tơdrong et soi so, tơdrong vei lăng pơsat, truh tơdrong tôn chĭng chêng, mih ma duch nă oei chĕp vei hơnơ̆ng tơ̆ plei hle. Găh noh dơ̆ng, tơdrong tanh brai vai khăn, tanh hơkăt, kơđum kơđŏng kŭm đei chĕp vei lơ̆m rim unh hnam. Nhôn oei hơnơ̆ng pơgơ̆r năr et soi, tôn chĭng chêng, hơri hơxoang vă kon pơlei ngôi hơdai, hơtŏk tơdrong ‘mêm băl, kŭm hăm băl vang vei kơjăp dôm tơdrong juăt ‘lơ̆ng đơ̆ng sơ̆ kơ hơdrĕch hơdrung.”

Tơ̆ plei Jứ, xăh Ia Tul, 207 unh hnam kon pơlei hơnơ̆ng đei ‘mi tih đak lip oei hăt pôk rĭ hnam tŏk oei tơ̆ plei hle xă vă jê̆ 22 ha. Lơ̆m noh, 152 unh hnam yuih hnam kơjung, năm pơm dơ̆ng tơ̆ plei hle vă da ƀiơ̆ huach jên hai, gơ̆h chĕp vei kơjăp tơdrong juăt pơm hnam kơjung thoi sơ̆ hai. Kăn ƀô̆ xăh kŭm hăm khul linh công an, dân quân vang tơgŭm yuih hnam, pai xa, sŏ đak păng hơmet gre vă chơ hnam ăn kon pơlei tŏk tơ̆ plei hle.

Ƀok Ksor Yu, bơngai jang tôch tơnăp tơ̆ plei Jứ, chơt hơiă pơma: “Dang ei, unh hnam nhôn ‘nao pôk hnam tŏk oei tơ̆ plei hle. Adrol ki, oei tơ̆ plei so, hơnơ̆ng lơ̆m pơyan ‘mi ‘nŏh đei đak lơ̆p, tơdrong arih xa kơ kon pơlei tôch pơmat tat, ƀât lăp kơpô, rơmo đak jroh hoch đĭ. Dang ei đei khul kơdră tơring hơmet ăn, tơgŭm anih oei xa ‘nao sơđơ̆ng ‘lơ̆ng, unh hnam tôch kơ hơiă păng hơđơ̆ng jơhngâm. Tơ̆ âu đei tôm anih kăl nhen hnam trưng, hnam pơgang…, kơna tơdrong jang xa, arih xa kơ kon pơlei kŭm hiôk hian ƀiơ̆. Nhôn hơmĕng jăh đei tơdrong arih xa sơđơ̆ng ‘lơ̆ng, jang xa roi tŏk pran tơ̆ plei hle. Inh bơnê kơ khul kơdră pơgơ̆r tơring hlôi tơgŭm ăn kon pơlei nhôn.”

Kiơ̆ tơdrong jang, dêh char Gia Lai đei 16 tơring athei pôk rĭ hnam kon pơlei jăh tŏk oei dơ̆ng tơ̆ plei hle, hăm 1.858 unh hnam, đei 13 tơdrong jang pơjing plei hle păng 3 trong jang hơmet ming pơlei pơla. Akŏm đĭ đăng jên jang hlŏh 2.100 ti. Lơ̆m noh, hlŏh 713 ti vă man hơmet anih jang, trong nơnăm mă ‘lơ̆ng; hlŏh 258 ti tơgŭm tơpăt ăn kon pơlei; păng hlŏh 1.136 ti vă ‘măn kla ăn tơdrong hrŭ ‘mong jên, chưk pơ ‘ngoăih teh.

Khei ‘năr âu ki, dôm xăh Ia Hiao, Ia Tul, Uar, Ia Rsai păng Ia Dreh hrơ̆ch pơgơ̆r bơ̆ jang tơdrong ‘nâu. Anih chĕp kơ̆l Đảng dêh char, Anih vei lăng kon pơlei dêh char Gia Lai tơlĕch năr tôch hơdăh athei bơ̆ jang mă đang, ‘nŏh jĭ: Adrol kơ ‘năr 30/8 pơjao rim anih kăl; adrol kơ ‘năr 31/10 chông kon pơlei lĕch đơ̆ng tơring krê hơmơt; adrol kơ ‘năr 30/11 pơgơ̆r hơlen năng rim anih jang đang, păng adrol kơ ‘năr 15/12 sơnăm ‘nâu athei jang đang đĭ đăng.

Tơ̆ xăh Ia Hiao – tơring oei hơmet anih oei xa ăn 180 unh hnam, ƀok Phạm Văn Phương – Bí thư Đảng xă pơma hơdăh đon pơhnŏng đơ̆ng tơring: “Tơdrong chă rơih dôm unh hnam bơ̆ jang hơdrol vă tơiung jơhngâm, pơlung đe nai hơđơ̆ng jơhngâm pơm kiơ̆. Truh dang ei, xăh tơlĕch lơ hơyak jang vă hrŭ ‘mong jên teh, tơgŭm ăn 24 unh hnam jang hơdrol. Găh trong bơ̆ jang, đơ̆ng dang ei truh ‘năr 1/10/2026, xăh adrin jang đang dôm tơdrong hơgăt vă asong tŏk oei, hơmet anih oei xa ăn 100 unh hnam; hơdai hăm ‘nŏh bơ̆ jang dôm tơdrong jang kăl nhen jô̆ hơlen teh, tơlĕch trong hrŭ ‘mong, kĭ ăn jên jang, chă rơih kơloăi hnam vă pơm rok păng tơlĕch trong man hnam tơ̆ plei hle. Truh ‘năr 31/12/2026, xăh adrin jang đang tơdrong kla jên teh tơ̆ plei so ăn kon pơlei păng tơlĕch dôm kơsô̆ jên tơgŭm mưh tŏk oei tơ̆ plei hle, pơm ‘lơ̆ng vă gơ̆h bơ̆ jang trŏ trong tơlĕch.”

Mĭnh pôm hnam ‘nao pơm kơjăp ‘lơ̆ng ưh lăp anih pring vei kon pơlei lơ̆m pơyan ‘mi kial đĕch, mă oei jing anih gơnang tôch hơđơ̆ng vă kon pơlei gơ̆h jang xa, arih xa hiôk sơđơ̆ng, ‘lơ̆ng hơiă. Đon tơchĕng đơ̆ng Đảng mât hơdai hăm jơhngâm đon kon pơlei, đon jang tơnăp đơ̆ng “Tơdrong jang Quang Trung” oei pơm ăn dôm tơring teh thŭng đak lơ̆p, tôch krê hơmơt jing dôm tơring oei xa ‘nao phĭ tơtŏ dơnŏ ‘lơ̆ng, pơdrŏng đei ƀôh./.