Pơgê năr 20/8, Tổng Bí thư, Kơdră chĕp pơgơ̆r teh đak Tô Lâm bơ̆ jang hăm Khul kơdră chĕp pơgơ̆r Trung ương găh Tơdrong vă jang pơtôch 5 sơnăm jang kiơ̆ Tơdrong tơchơ̆t kơsô̆ 28 kơ Khul kơdră chĕp pơgơ̆r Trung ương Đảng jăl XIII găh hơnơ̆ng tơplih ‘nao trong chĕp pơgơ̆r, pơrô̆ jang đơ̆ng Đảng hăm khul jang chinh trĭ lơ̆m jăl tơplih ‘nao. Lăp đơ̆ng rŏng mơ̆ng đŏk tơbăt tơdrong jang păng rim nơ̆r tơgop, Tổng Bí thư, Kơdră chĕp pơgơ̆r teh đak Tô Lâm athei Khul chĕp pơgơ̆r Trung ương drơ̆ng mĭnh nơ̆r găh hơnih, trong tơlĕch jang, tơdrong jang kơ Tơdrong vă jang. ‘Nou jĭ tơdrong jang chinh trĭ gĭt kăl hloh găh tơ iung pơjing Đảng păng khul jang chinh trĭ; trong tơlĕch jang ưh khan lăp jang keh đang hla bơar chih tơbăt tơdrong bơ̆ jang dăh mă pơjing dơ̆ng rim hla bơar tơchơ̆t, mă lei lăng ƀôh hơdăh tơdrong găn ga jang ‘lơ̆ng chĕp pơgơ̆r, pơrô̆ jang, đơ̆ng noh tơlĕch ăn trong jang ‘lơ̆ng lơ̆m jăl ‘nao. Tổng Bí thư, Kơdră chĕp pơgơ̆r teh đak pơma hơdăh, tơplih ‘nao trong pơrô̆ jang, chĕp pơgơ̆r ưh kơ đei pơm tơplih tơdrong jang păng trong chĕp pơgơ̆r tơm kơ Đảng, mă lei vă pơm ăn tơdrong chep pơgơ̆r ƀlep, kyăp, gơh hơgei, hơtŏ hơnơ̆ng, tơpăt ‘lơ̆ng hloh dơ̆ng. Adoi, kăl mĭnh nơ̆r ƀơ̆r đon ƀôh hơdăh păng iung jang găh pơrô̆ jang, chĕp pơgơ̆r; jang kiơ̆ trong jang “Đảng chĕp pơgơ̆r, teh đak vei lăng, Kon pơlei pơm tơm”.