Pơma pơtôch jơ bơ̆ jang, Tổng Bí thư, Kơdră chĕp pơgơ̆r teh đak Tô Lâm pơma hơdăh, bơngai hơngei jĭ khul gĭt kăl hloh kơ teh đak. Tơdrong atŏk tơ iung, hơvơn păng tơmơ̆t jang hăm bơngai hơgei jĭ tơdrong git kăl hloh lơ̆m atok tơ iung Teh đak, iok tơdrong đei iok yoa kơ teh đak, hơdrĕch hơdrung păng tơdrong jang kiơ̆ rim tơdrong jang kăl pơm trong pơchoh ăn tơm hloh. Tổng Bí thư, Kơdră chĕp pơgơ̆r teh đak athei, hơlen hơdăh, tơƀôh hơdăh bơngai hơgei ‘moi kiơ̆ lăng jơhngơ̆m đon ‘lơ̆ng, bơ jang hơgei, tơchăr hơgei, jang keh đang hơdăh, tơdrong tơgop hơdăh; ưh kơ lăng lei lăi găh bơngai hơgei hăm bơngai đei ƀăng hŏk kơjung, kơchư̆k tih dăh mă jang đunh sơnăm. Adoi, kăl lăng kơjăp hơvơn bơngai hơgei hăm tơmơ̆t jang, pơjao tơdrong jang hơdăh; tơplih ‘nao trong tơgŭm djru, pơjing đei trong plang ăn păng pơih să ăn atŏk tơ iung. Khul kơdră chĕp pơgơ̆r Teh đak, hơnih jang, tơring kăl sơkơ̆t hơdăh dôm trong jang tih kăl đei bơngai hơgei xek tơlang, tơklep hăm trong tơlĕch jang, tơdrong jang, jơ ‘năr pơkă păng trong hơlen jang.