Hla bơar chih tơbăt bơ̆ jang đơ̆ng Hơnih tơm vei lăng Joh ayŏ kơdŏ soang, Đă ƀŏng lŏng tơplŏng kơdou păng Tơmang pơhiơ̆ tơbăt, hrei ou, lơ̆m teh đak đei hloh 40.000 hơnih gru gra gĭt kăl dăr sơnăm păng dang vă jê̆ 70.000 mŭk drăm oei sa joăt joe ‘lơ̆ng rŏ đei chih jô̆. Lơ̆m ou đei 37 muk drăm gĭt kăl dăr sơnăm hlôi đei UNESCO pôk bơnê. Iung pơma tơ̆ jơ bơ̆ jang, Tổng Bí thư, Kơdră chĕp pơgơ̆r Teh đak athei Hơnih jang vei lăng joh ayŏ hơlen jang kiơ̆ ‘lơ̆ng trong tơlech ăn, xek tơlang keh đang dôm tơdrong tim mă lăp, adoi iung jang pơm đei lơ rim tơmam mong răk teh đak ‘moi kiơ̆ tơchă akŏm dôm mŭk drăm gĭt kăl đơ̆ng teh đak đe păng hơmet pơ ‘lơ̆ng hơnih vei răk muk drăm gĭt kăl dăr sơnăm atŏk tơ iung teh đak hloh 80 sơnăm ou ki. Mă kăl, Tổng Bí thư, Kơdră chĕp pơgơ̆r teh đak pơma hơdăh hơnăp jang kơ jơhnơr hrei ou ưh khan lăp vei lăng mŭk drăm đơ̆ng mĕ ƀă yă ƀok bơ̆n đơ̆ng sơ̆ mă oei iung jang pơjing đei mŭk drăm gĭt kăl dăr sơnăm ăn jơhnơr đơ̆ng rŏng. Hơnih jang vei lăng Joh ayŏ oei sa kăl tơplih đơ̆ng jơhngơ̆m đon tơchĕng mong răk sơ̆ ki jing iung jang tơƀôh tơƀlŏk dôm muk drăm sơ̆ ki kơ teh đak; tơ iung pơjing rim trong pơkăp hơlen “tơdrong gĭt kăl muk drăm sơ ki” đơ̆ng trong jang proh hơmet hloi, tơmơ̆t jên jang păng pơm “hô sơ ƀlŏk hơdơ̆r” ăn rim hơnih git kăl vă vei răk nhen so.