Tổng Bí thư, Kơdră chĕp pơgơ̆r teh đak Tô Lâm sơkơt hơdăh, Việt Nam lăng kơjăp păng ‘măn ăn kăl hloh ăn tơdrong hơmet pơ ‘lơ̆ng, atŏk tơ iung tơgoăt tơgoăl hăm Lào, tơgŭm djru kơtang, tôm tong lơ̆m tơdrong jang tơplih ‘nao kơ Lào. Tổng Bí thư, Kơdră chĕp pơgơ̆r teh đak Tô Lâm athei ƀar Đảng, ƀar Teh đak kăl hơnơ̆ng iung jang hơdoi kơjăp, hơdăh păng tơlĕch jang jơnei rim tơdrong drơ̆ng mĭnh nơ̆r kơdră kơpal, akŏm lơ̆m pơtrŭt kơtang iŏk đei jơnei jang hơdoi kăl, mŭk drăm-mơdro sa hăm rim tơdrong jang, tơdrong vă jang, hơnih jang hơdăh ‘moi kiơ̆ dôm tơdrong đei, tơdrong ‘meh vă kơ teh đak, tơgăl hăm tơdrong tơgoăt jang hơdoi chinh trĭ păng tơdrong đei kơ ƀar teh đak, vă ƀar teh đak vang atŏk tơ iung. Ƀar Kuô̆k hô̆i gô hơnơ̆ng atŏk kơtang tơƀơ̆p pơma dơnuh dih băl, tơbăt dih băl dôm tơdrong hlôh vao, jơnei, pơm hơtŏk iŏk đei jơnei jang kiơ̆ hơnăp jang, sơnong jang, tơdrong jang păng gơh jang kiơ̆ tơdrong tơchơ̆t kơ teh đak kơdih; iung jang hơdoi kơjăp hăm rim hơnih đei ƀơm truh vă sơđơ̆ng rim trong tơlĕch jang, drơ̆ng mĭnh nơ̆r jang hơdoi ƀar păh ƀar Đảng, ƀar Teh đak đei iung jang kơtang păng tơlĕch jang kiơ̆ jơnei.