Puăn bơngai jang đei pôk jang ou noh: Lê Văn Đông, Đào Thịnh Cường, Trần Thế Kính păng Nguyễn Đức Bằng. 'Nou jĭ kơchư̆k jang khôi luơ̆t kơpal hloh lơ̆m Hơnih Hơlen tơdrong glăi lơ̆m tơpôl. Pơma ah jơ lêh, Tổng Bí thư, Kơdră teh đak bơ̆n Tô Lâm bơnê kơ dôm bơngai đei pôk jang ou, atŭm hăm noh ră hơdah ou jing tơdrong chơt hơ-iă tih hloh păng adoi jing sơnong jang trăp trĭn hloh hăm Đảng, Teh đak, Kon pơlei, păng Khôi luơ̆t teh đak.

Tổng Bí thư, Kơdră teh đak bơ̆n pơtruh nơ̆r hăm rim bơngai jang kơ Hơnih Hơlen tơdrong glăi lơ̆m tơpôl hơtŏk tơdrong jang gơh hơlen tơkêng tơhlou kiơ̆ trŏ luơ̆t pơkăp; iŏk tơdrong đei trŏ luơ̆t, hơtŏ hơnơ̆ng păng pơtrŏ hăm rim tơdrong tơchơ̆t vă pơm 'long pơtŏ. Atŭm hăm noh, athei tơjră hăm tơdrong pơm glăi, ưh đei lê̆ hiơt tơdrong pơm yoch; ưh đei pơm kơdêh tơdrong tơsŭl oei xa, tơdrong jang mŭk drăm, hanh chĭnh păng ưh đei jang ăn tơdrong pơyua kơdih ăn khul, ưh đei iŏk yua yoch glăi khôi luơ̆t lơ̆m tơdrong pơm jang.