Dôm sơnăm âu ki, hăm tơdrong chĕp kơ̆l pơgơ̆r đơ̆ng Đảng, tơdrong vei lăng đơ̆ng Teh đak păng tơdrong vang adrin đơ̆ng đĭ đăng tơpôl, tơdrong jang vei sơđơ̆ng tơdrong arih xa tơpôl iŏk đei lơ tơdrong gĭt kăl, truh dang ei lơ̆m teh đak đei hlŏh 99 triu ‘nu bơngai vang răt ƀao hiêm pơgang; dang 2,5 triu ‘nu bơngai đei xa jên tơgŭm đơ̆ng tơpôl, pơih xă tơdrong vei lăng hăm bơngai kră ưh đei jên hưu. Tơdrong tơgŭm tơjur tơnuh hin, asong tŏk iŏk jên, tơgŭm hnam oei, pơtho pơhrăm, jang pơgang, tơdrong jang xa păng tơgŭm mưh đei sar bar tŏ ‘mi kial kơnê̆ jing tơdrong đei gơnang yoa đơ̆ng kơ triu unh hnam.

Tổng Bí thư, Kơdră teh đak Tô Lâm akhan, tơdrong jang vei sơđơ̆ng arih xa tơpôl jang đei lơ tơdrong ‘lơ̆ng, gĭt kăl. Mă lei, tŏ ‘mi kial kơnê̆, tơdrong jĭ jăn, tơdrong jur tŏk tơ̆ anih jang kŭm oei ƀơm ưh ‘lơ̆ng truh tơ̆ lơ bơngai. ‘Meh kon pơlei đei vei lăng ‘lơ̆ng tơ̆ hơnăp dôm tơdrong krê hơmơt, Teh đak athei đei tơdrong tơgŭm mă trŏ, anih jang athei gơ̆h tơdra hiă hơdrol, tơlĕch trong tơjră păng tơgŭm tơtom. Tổng Bí thư, Kơdră teh đak athei pơjing dôm kơsô̆ chih hơgăt mă ‘lơ̆ng ăn teh đak găh vei lăng sơđơ̆ng tơdrong arih xa tơpôl, roi tơbăt rim sơnăm kiơ̆ tơring păng dôm grŭp kon pơlei.

Đon pơhnŏng truh sơnăm 2030 ‘nŏh pơjing đei anih vei sơđơ̆ng tơdrong arih xa tơpôl lơ tăl, jơ̆p jang, chih tơmât lơ̆m kơmăy sô̆, pơm ‘lơ̆ng ăn tơdrong arih xa kơ rim bơngai. Tổng Bí thư, Kơdră teh đak athei Khul kơdră teh đak, Quốc hội, Mặt trận Tổ quốc Việt Nam, rim anih chĕp kơ̆l Đảng, Khul kơdră pơgơ̆r tơring păng đĭ đăng tơpôl vang bơ̆ jang, adrin vă rim bơngai Việt Nam, mă đơ̆ng oei tơ̆ yơ, arih xa thoi yơ kŭm đei vei lăng tơ̆ hơnăp dôm tơdrong krê hơmơt, đei xa yoa dôm tơdrong pơvih pơvăn kăl păng đei tơdrong ‘lơ̆ng vă gơ̆h jang tŏk.