Tơ̆ ‘măng tơƀơ̆p muh măt, Tổng Bí thư, Kơdră teh đak hlôi tơƀôh ăn 4 tơdrong tơm, 'noh jĭ: Athei lăng băt hơdăh trŏ ƀlep găh tơdrong ‘lơ̆ng đơ̆ng đei rơih hơmet vă mơ̆t jang păng hơnăp jang đơ̆ng kang ƀô̆ lơ̆m proh hơmet lê̆ hơdrol; Athei pơkăp ‘lơ̆ng tơdrong kĕ jang tơpă đơ̆ng khŭl kang ƀô̆ vă mơ̆t jang lơ̆m Ban Bí thư vei lăng lơ̆m jăl jang ‘nao. ‘Long rek pơtŏ tuch luch athei jing tơmam, pơtôch, đei ƀơm truh, bưng ai păng tơdrong pơvih pơvăn kon pơlei; Athei tơplih ‘nao tơdrong vei lăng, pơhrăm păng iŏk yua kang ƀô̆ đơ̆ng rŏng kơ đei rơih hơmet. Ƀok tơtă truh tơdrong pơm hơnih vă kang ƀô̆ pơ̆n tơchĕng, pơ̆n jang, pơ̆n pŭ hơnăp jang.

Tổng Bí thư, Kơdră teh đak Tô Lâm tơroi rơđăh tơdrong hơmet ăn khŭl kang ƀô̆ năr ‘nâu ‘noh jĭ hơmet ăn tơdrong kĕ chĕp kơ̆l đơ̆ng Đảng ăn dôm jăl trong hơtŏk tơiung ‘nao. Đei rơih hơmet ‘noh jĭ tơdrong hơmet ăn, pơhrăm, lăng ƀôh păng rơih iŏk; ưh kơ sĭ hơmet ăn “tang dŏ” ăn kang ƀô̆ chĕp kơ̆l. Tổng Bí thư, Kơdră teh đak pơma hơdăh; kơchư̆k jang ‘noh jĭ tơdrong klăih song jang đơ̆ng khŭl jang; tơdrong gơh chĕp kơ̆l ‘noh jĭ tơdrong pơjao ăn vă pơvih ăn teh đak păng kon pơlei; bưng ai păng tơdrong plang pơyơ̆r yua đơ̆ng rim bơngai pơm tơiung. Jơhngơ̆m đon ‘lơ̆ng păng tơdrong kĕ jang đơ̆ng kang ƀô̆ athei đei lăng ƀôh lơ̆m yan âu, hăm trong iŏk yua tơdrong chĕp kơ̆l, hăm iŏk yua tơdrong jang păng đon lui đơ̆ng kang ƀô̆, đảng viên păng Kon pơlei./.