Tổng Bí thư, Kơdră teh đak Tô Lâm pơma hơdăh Việt Nam ling lang năng kăl tơdrong pơvei ‘lơ̆ng hơiă đơ̆ng sơ̆ păng jang hơdoi gĭt kăl tôm tơdrong hăm teh đak Nga, năng Nga jĭ 1 lơ̆m dôm teh đak jang hơdoi gĭt kăl tơm dơnơm lơ̆m trong jang tơbôl đơ̆ng Việt Nam. Việt Nam ling lang chih răk păng năng kăl tơdrong tơgŭm tih tên, đĭ jơhngâm đơ̆ng kon pơlei Liên Xô adrol sơ̆ păng kon pơlei Nga hrei ‘nâu hăm tơdrong iung tơblăh iŏk rơngei hơdrĕch hơdrung, pơjing đei 1 teh đak kơjăp ‘lơ̆ng, kŭm nhen pơjing păng vei lăng Teh đak.

Tổng Bí thư, Kơdră teh đak pơma hơdăh tơdrong pơvei Việt Nam – Nga hlôi đei pơlong nol kiơ̆ lơ chăl păng lơ tơdrong tơplih lơ̆m apŭng plenh teh, jing tơmam kăp gĭt atŭm kơ 2 hơdrĕch hơdrung. Việt Nam hơpơi ‘mĕh 2 păh hơnơ̆ng vei kơjăp, tưk tơiung tơdrong ‘lơ̆ng, hơdai hăm hơmet pơ ‘lơ̆ng dôm tơdrong kăl vă jang hơdoi ‘nao, lăp hăm tơdrong ‘mĕh vă jang tŏk lơ̆m chăl hrei ‘nâu.