Pơm jang păng thơ thou Têt hăm Đảng ƀô̆, jơnŭm pơgơ̆r tơring păng Kon pơlei dêh char Tây Ninh, Tổng Bí thư Tô Lâm pơtruh nơ̆r hăm đe kơdră kơpal 'lŏ kră kơ kăch mang, đe yă đei hơnăn Mĕ Việt Nam Nuih mơng, đe Khul linh jang rơgei nuih mơng, bơngai jang rơgei 'lơ̆ng, atŭm hăm kang ƀô̆, khul linh  păng kon pơlei dêh char Tây Ninh nơ̆r thơ thou kăp gĭt sô̆ sơnăm 'nao grăng pran, jơnap, pơm jang đei jơnei keh kong. Tổng Bí thư ră hơdah, đơ̆ng dang ei truh sơnăm 2030 păng hơtaih hloh noh truh sơnăm 2045 kăp gĭt hloh hăm tơdrong hơtŏk tơ-iung kơ teh đak. Lơ̆m tơchơ̆t jang noh, Tây Ninh đei sơnong jang kăp gĭt, ưh hơdrô̆ hăm tơdrong hơtŏk tơ-iung hơdrô̆ kơ dêh char, mă oei hăm jơ̆p tơring păng jơ̆p teh đak. Tây Ninh đei tơring teh sơlam kơjăp sơđơ̆ng, jing hơnih kăp gĭt tơkuh tơring Hơlĕch pơbăh păng Pơmơ̆t pơbah kơ teh đak; jing hloi tơring vei sơđơ̆ng, rơngei, tơbôl, păng jing tơring hơtŏk tơ-iung 'nao gah kŏng ngĭp, tĕch pơdro, jang logistics păng mŭk drăm 'măng sơlam.

Tổng Bí thư pơgơ̆r hăm tơring ou athei pơgơ̆r 'lơ̆ng tơdrong pôk rơih bơngai jang tang măt ăn Kuô̆k hô̆i jăl 16 păng Hô̆i đŏng kon pơlei dôm jăl jang 2026–2031; rơih đei dôm bơngai tang măt tơpă gơh hơgei, tang măt ăn tơdrong hơpơi 'meh đơ̆ng kon pơlei, tơgop hơtŏk tơdrong pơm jang kơ dôm hơnih jang mă kon pơlei pôk jang; păng akŏm vei sơđơ̆ng sơlam teh đak, vei sơđơ̆ng tơpôl hơrih xa tơ̆ tơring, mă kăl noh tơ̆ dôm jăl trong sơlam teh; pơjing trong sơlam rơngei hiôk hian, tơbôl, jang hơdoi păng hơtŏk tơ-iung.