Atŭm hăm Tổng Bí thư Tô Lâm đei Thủ tướng teh đak bơ̆n Phạm Minh Chính, Kơdră Kuô̆k hô̆i Trần Thanh Mẫn atŭm hăm lơ kơdră kơpal kơ Đảng, Teh đak bơ̆n. Việt Nam păng Campuchia iung jang tơbôl ah năr 24/6/1967, dang ei Việt Nam jĭ teh đak jang tĕch pơdro tih mă 3 kơ Campuchia, đơ̆ng rŏng kơ Trung Quốc păng Mi. 'Măng năm pơm jang đơ̆ng Tổng Bí thư Tô Lâm jĭ 'măng vă rim kơdră kơpal hloh kơ 2 teh đak hơtŏk pơma đam, hơmet đon lui chinh trĭ, hơtŏk jang đei jơnei dôm tơchơ̆t hlôi đei pơdrơ̆ng; kiơ̆ đơ̆ng noh kơhret hloh dơ̆ng tơdrong jang tơbôl juăt jue kơ 2 Đảng, 2 teh đak, pơjing jơhngơ̆m pran hơ-'nhăk tơbôl Việt Nam-Campuchia tŏk ah minh jăl jang 'nao.

Adrol kơ ‘nŏh, lơ̆m ‘măng năm ngôi tơ̆ teh đak Lào, Tổng Bí thư Tô Lâm đei jơ pơma đam hăm Tổng Bí thư, Kơdră teh đak Lào Thongloun Sisoulith; pơma nuh hăm Thủ tướng Lào Sonexay Siphandone, Kơdră Quốc hội Lào Saysomphone Phomvihane; sơng Kơdră Mặt trận Lào tơiung pơjing teh đak Kikeo Khaykhamphithoune; năm ngôi tơ̆ Anih jang tang măt ăn Việt Nam tơ̆ Lào păng tơƀâp tơpôl bơngai Việt Nam tơ̆ Lào...

Ƀlep ƀât ‘măng mă âu, Thủ tướng Phạm Minh Chính tơƀâp Thủ tướng Lào Sonexay Siphandone; Kơdră Quốc hội Trần Thanh Mẫn tơƀâp Kơdră Quốc hội Lào Saysomphone Phomvihane; kơdră chĕp kơ̆l 1,2 anih tơm kơ 2 teh đak kŭm tơƀâp, pơma nuh hăm băl ‘năi, vă hơtŏk tơdrong jang hơdoi đơ̆ng 2 păh. Lơ̆m ‘măng năm ngôi, đei pơgơ̆r lêh pơjao dôm hla ar kăl găh jang hơdoi đơ̆ng dôm anih tơm, tơring tơrang kơ teh đak Lào păng Việt Nam lơ̆m dôm tơdrong pơtho hŏk pơhrăm, jang tư phap păng jang hơdoi đơ̆ng dôm tơring; hơnơ̆ng pơjing tơdrong ‘lơ̆ng găh luơ̆t păng jơhngâm pran ‘nao, chih hơdăh dôm tơdrong kăl vă jang hơdoi đunh đai đơ̆ng 2 teh đak.