Ƀok Tổng Bí thư Tô Lâm, Thủ tướng Phạm Minh Chính, Kơdră Kuôk hô̆i Trần Thanh Mẫn atŭm hăm rim bơngai jang lơ̆m Anih tơm Chĭn trĭ, Ƀĭ thư Trung ương Đảng vang năm akŏm. Ƀok Tổng Bí thư Tô Lâm ăn tơbăt, pơhrăm gah khua hŏk kŏng ngê̆, tơplih 'nao gơh hơgei păng tơplih kơsô̆ kơ teh đak oei lơ̆m pơkăp, tơdrong pơm jang đơ̆ng Anih tơm Chĭn trĭ, Ƀan ƀĭ thư, ou jĭ tơdrong jang hơdah, pơkăp khŏm mă jang đei đơ̆ng đe kơdră Đảng, Jơnŭm pơgơ̆r teh đak pơm jang jơnei Tơchơ̆t 57 đơ̆ng Anih tơm Chĭn trĭ. Vă pơgơ̆r pơm jang đei jơnei Tơchơ̆t ou noh kơdih rim kơdră jang lơ̆m Anih tơm Chĭn trĭ, bơngai jang lơ̆m Ƀan ƀĭ thư yuk hơlou hơlen dôm tơdrong 'nao, tơdrong tơnap păng tơplih hơnơ̆ng ou.

Ƀok Tổng Bí thư pơjao ăn Đảng uy Jơnŭm pơgơ̆r teh đak păng Anih jang Trung ương Đảng, anih juăt jang kơ Jơnŭm pơgơ̆r Trung ương gah hơtŏk khua hŏk, kơmăi kơmŏk tơplih 'nao păng tơplih kơsô̆, chih akŏm tôm nơ̆r tơgop đơ̆ng bơngai jang lơ̆m Anih tơm Chĭn trĭ, Ƀĭ thư Trung ương vă hơmet, keh đang tơbang lơ̆m hop akŏm Trung ương 11 truh ou kơnh, lơ̆m noh athei tơrĕk kăp gĭt gah hơlen băt trong jang 'nao lơ̆m apŭng plenh teh gah khua hŏk kơmăi kơmŏk tơplih sô̆, tơplih 'nao trong jang, tơlĕch dôm tơdrong jang hơdah vă pơm jang đei jơnei kiơ̆ Tơchơ̆t 57 đơ̆ng Anih tơm Chĭn trĭ lơ̆m khei năr truh.