Lăp đơ̆ng rŏng lêh sơng, Tổng Bí thư Tô Lâm hlôi pơma đam hăm Tổng Bí thư, Kơdră teh đak Thongloun Sisoulith. Tổng Bí thư Tô Lâm păng Tổng Bí thư, Kơdră teh đak Thongloun Sisoulith tơƀôh jơhngơ̆m đon chhôk hơiă tơ̆ hơnăp dôm hơyak hơtŏk tơiung jrŭ să, đei yua păng ‘lơ̆ng lơ̆m tơdrong pơvei jang hơdai Việt Nam - Lào khei ‘năr âu ki. Kiơ̆ lơ̆m dôm trong jang tih hăm trĕng lăng đunh đai hlôi đei 2 păh drơ̆ng 1 nơ̆r, 2 kơdră chĕp kơ̆l drơ̆ng nơ̆r kăl kơ akŏm tơlĕch jang hloi lơ̆m jăl jang âu.

Kiơ̆ kơ ‘noh, 2 păh hơnơ̆ng hơtŏk loi dơ̆ng pơma dơnuh, roi tơbăt tơdrong hlôh vao lơ̆m kơplăh tơlĕch jang tơdrong Tơchơ̆t Hop akŏm đơ̆ng 2 Đảng. Hơdai hăm ‘noh, tŭn pran tơklep hơdai 2 mŭk drăm, tơgŭm hơdrol akŏm jên jang, jang hơdai kơjăp păng tơlĕch jang kơtang dôm tơdrong jang gĭt kăl, pơm tơdrong ‘lơ̆ng ‘nao ăn tơklep hơdai mŭk drăm, tĕch mơdro, tơmơ̆t jên jang păng hơtŏk tơiung tơring, hơdrin iŏk đei đơ̆ng tĕch mơdro 2 pang đei 10 ti USD tơ̆ hơnăp kơnh.