Tơ̆ jơ pơma nuh, Tổng Bí thư Tô Lâm lui, ‘măng năm ngôi đơ̆ng Ƀok Pơtao, hăm tơdrong vang kiơ̆ đơ̆ng lơ kuan tih, kơdră chĕp kơ̆l anih tĕch mơdro, hnam trưng đăi hŏk, Anih tơchĕng hơlen, gô pơjing jơhngâm pran ‘nao, hơnhăk tơdrong pơvei jang tơbôl, jang hơdoi lơ tơdrong đơ̆ng Việt Nam păng Bỉ roi ‘lơ̆ng păng đei yoa hlŏh dơ̆ng, pơm lăp hăm tơdrong đei yoa đơ̆ng kon pơlei 2 teh đak, tơgop ‘lơ̆ng ăn tơdrong rơngei, hiôk hian păng jang tŏk tơ̆ tơring păng lơ̆m apŭng plenh teh. 

Vă tơgăl hăm dôm tơdrong pran păng tơdrong pơvei chinh trĭ ‘lơ̆ng hơiă, Tổng Bí thư pơma hơdăh, 2 teh đak athei hơnơ̆ng pơm pơ ‘lơ̆ng hlŏh dơ̆ng tơdrong jang hơdoi găh tĕch mơdro – tơmât jên jang, choh jang xa kơjăp ‘lơ̆ng, pơtho pơjing khul bơngai jang rơgei, jŏh ayŏ kơ dŏ xoang, chă tơmang lăng, pơvei ăn kon pơlei, atŭm hăm ‘nŏh hơtŏk hlŏh dơ̆ng tơdrong jang hơdoi mă ‘lơ̆ng găh tơdrong jang khoa hŏk – kơmăy kơmŏk, tơplih ‘nao rơgei, mă loi ‘nŏh găh trong atŏk tơiung anih tĕch mơdro đơ̆ng Hnam trưng đăi hŏk Bỉ, tơgop tơgŭm ăn Việt Nam jang đei dôm tơdrong pơhnŏng vă jang tŏk truh sơnăm 2030 păng 2045.