Tơ̆ jơ sơng, ƀok Tổng Bí thư Tô Lâm sơkơ̆t hơdah Việt Nam hơnơ̆ng lăngteh đak Nga jĭ minh lơ̆m dôm teh đak jang hadoi kăp gĭt lơ̆m tơchơ̆t jang tơbôl. Việt Nam hơpơi 'meh pơtoi tơdrong jang tơbôl juăt jue 'lơ̆ng rŏ, pơtrŏ hăm tơdrong pơyua kơ kon pơlei 2 teh đak, tơgop vei sơđơ̆ng rơngei, jang hadoi păng hơtŏk tơ-iung tơ̆ 2 tơring păng lơ̆m apŭng plenh teh.

Vă pơtoi hơtŏk jang đei jơnei kơ tơdrong jang hadoi 2 pah, mă kăl lơ̆m sơnăm 2025 ƀơ̆t tơbăt 75 sơnăm iung jang tơbôl, ƀok Tổng Bí thư Tô Lâm pơtruh nơ̆r, 2 pah pơtoi hơtŏk tơdrong hơpeh hơpong đe kơdră kơpal hăm dih băl; jang hadoi kơjăp lơ̆m tôm tơdrong jang; pơm jang tơnăp Tơchơ̆t Tĕch pơdro hiôk hian Việt Nam – Jơnŭm jang hadoi Mŭk drăm Á - Âu; sơkơ̆t hơdah dôm trong jang hlôi pơkăp păng tơdrong jang hadoi 'nao lơ̆m tơdrong vei sơđơ̆ng tơpôl, kơmăi kơmŏk 'nao, unh hơyuh, hơlen khua hŏk, joh ayŏ tơpôl ou to.