Tổng Bí thư pơtruh nơ̆r jet gia pơma nuh hăm tơpôl bơngai Việt Nam tơ̆ teh đak đe, chih răk jơhngâm đon ‘mêm kơ teh đak, đon jang tơnăp hăm pơlei pơla, hăm teh đak. Tổng Bí thư pơma hơdăh, Đảng păng teh đak bơ̆n hơnơ̆ng vei kơjăp đon tơchĕng kon pơlei jĭ tơm dơnơm, jĭ tơ ‘ngla, jĭ đon pơhnŏng, jĭ jơhngâm pran vă jang tŏk; lơ̆m noh, tơpôl bơngai Việt Nam tơ̆ teh đak đe jĭ 1 păh ưh đei gơ̆h tơpleh đơ̆ng hơdrĕch hơdrung Việt Nam, jĭ jơhngâm pran gĭt kăl đơ̆ng tơguăt đĭ đăng hơdrĕch hơdrung lơ̆m chăl  jang tŏk ‘nao.

Tổng Bí thư hơpơi ‘mĕh, kon pơlei bơ̆n oei xa tơ̆ teh đak đe hơnơ̆ng pơm kiơ̆ ‘lơ̆ng khôi luơ̆t tơ̆ teh đak oei arih xa, mât 1 ƀơ̆r đon vang pơjing tơpôl roi đunh roi pran, pơm hơtŏk anih dơ̆ng, bưng ai ăn tơpôl; hơnơ̆ng vei kơjăp, roi tơƀôh dôm tơdrong juăt ‘lơ̆ng đơ̆ng Việt Nam, pơjing um rup ‘lơ̆ng hơiă găh teh đak, kon bơngai Việt Nam lơ̆m măt lăng đơ̆ng bôl boăl lơ̆m apŭng plenh teh.