‘Năr 6/8, Anih Tơroi tơbăt păng Krao hơvơn kon pơlei Trung ương jang hơdai hăm Anih jang Đảng Mặt trận Tổ quốc, dôm khŭl grŭp Trung ương, Anih jang Đảng kơ Anih tơm khoa hŏk kơmăy mŏk, Anih jang Đảng kơ Anih tơm vei lăng găh Joh ayŏ Tơplŏng kơdâu păng Tơmang lăng păng dôm anih jang ƀơm truh pơgơ̆r Hop akŏm tơƀơ̆p muh măt 80 ‘nu bơngai tang măt hŏk jrŭ, bơngai jang khoa hŏk, văn ngê̆ si lơ̆m teh đak. Pơma tơ̆ jơ tơƀơ̆p muh măt, Tổng Bí thư Tô Lâm tơƀôh jơhngơ̆m đon ƀlŏk hơdơ̆r gĭt kăl truh lơ lap khŭl hŏk jrŭ, bơngai jang khoa hŏk, văn ngê̆ si lơ̆m teh đak prăt khei ‘năr âu ki ling lang vang yak hơdai hăm Đảng, Teh đak păng hơdrĕch hơdrŭng, răp mơ̆ng păng chih iŏk dôm nơ̆r tơgop ‘lơ̆ng đơ̆ng dôm bơngai tang măt vang truh akŏm jơ tơƀơ̆p muh măt.

Tổng Bí thư ‘meh vă tơ̆ hơnăp kơnh khŭl bơngai hŏk jrŭ, bơngai jang khoa hŏk, văn ngê̆ si kơ teh đak bơ̆n hơnơ̆ng hơtŏk tơdrong joăt joe kăp gĭt, plang pơyơ̆r tơdrong gơh hơgei, hơnơ̆ng pơcheh lơ tơdrong jang, ƀai joh ayŏ kơ dŏ soang lơ, đei kơjă kăp gĭt, vang yak hơdai hăm Đảng, Teh đak păng kon pơlei khŏm pơjing Teh đak rơngei, hiôk hian, pơdrŏng pran, hơnŭk hơnoa, hiôk chơt lơ̆m chăl ‘nao.