Lăp đơ̆ng rŏng drơ̆ng đei jing tơring tơrang ‘nao lơ̆m sơnăm 2017, dôm sơnăm ou ki, tơring Dà Sar, apŭng Lạc Dương, dêh char Lâm Đồng hơnơ̆ng hơdrin hơmet pơ ‘lơ̆ng păng atŏk ‘lơ̆ng hloh dơ̆ng tơring tơrang ‘nao. Lơ tơdrong jang, ‘măng hơvơn đei tơlĕch jang jơnei. Gơnơm đơ̆ng noh, jang sa iŏk đei jô̆ hơtŏ măt bơngai lơ̆m sơnăm 2024 ‘noh 60 triu 400.000 hlak jên, tŏk 31 triu 900.000 hlak jên pơtêng hăm sơnăm 2017. Ƀok Cil Ha Ôñ oei tơ̆ tơring Dà Sar, apŭng Lạc Dương pơma:“Tơ̆ ou ba ƀôh hơdăh kon pơlei pơla hlôi tơplih kơtang găh mŭk drăm, đơ̆ng rŏng rơngei atŏk tơ iung kơtang, hơdrol rơngei jang sa ưh kơ đei lĕch nhen lơ lou, ba ƀôh hơ iă dêh”.

Jĭ tơring đei vă jê̆ 70% măt bơngai kon pơlei ‘noh bơngai kon kông, apŭng Lạc Dương hơnơ̆ng lăng kơjăp bơ̆ jang vei lăng năng tông kon kông. Lơ̆m ou, Tơdrong jang tơ iung pơjing tơring tơrang ‘nao, apŭng Lạc Dương hlôi tơgŭm atŏk tơ iung choh jang sa, pơm hơtŏk jang sa iŏk yua kơjăp ăn kon pơlei kon kông. Lơ̆m apŭng đei 23 Hợp tak xah, 36 khul jang hơdoi lơ̆m choh jang sa. Ƀok Cil Poh, Kơ iĕng Kơdră chĕp pơgơ̆r Hnih vei lăng kon pơlei apŭng Lạc Dương tơroi tơbăt, lơ trong jang choh jang sa hơdoi, tĕch răt tơmam drăm hlôi tơgŭm ăn kon pơlei tơring kon kông atok tơ iung mŭk drăm mơdro sa. “Ba hơ iă dêh mưh ƀôh kon pơlei kon kông tơ̆ Lạc Dương đei tơdrong tơplih lơ lơ̆m choh jang sa, kon pơlei jang sa rơvơn hloh. Mă kăl tơdrong jang ba tơmang pơhiơ̆ roi năr roi lang să jơ̆p pơlei pơla, mă kăl găh choh jang sa hăm kmăi kmŏk ‘nao nhen pơtăm ‘long hồng, atiso, pơmur hơnhăk đei iŏk yoa kơjăp ăn kon pơlei, đơ̆ng  noh hlôi vang tơgop atŭm hăm tơring hrôih jang keh đang 19 trong tơlĕch jang tơring tơrang ‘nao”.

Kiơ̆ chih jô̆, lơ̆m dêh char Lâm Đồng đei hloh 350 hơnih mơdro sa, hloh 50 hơp tak xah, khul jang hơdoi kơ yuơ kon kông pơm tơ-‘ngla, dơ̆ng hơlou hăm kon jên jang sa hloh 2.770 ti hlak jên; ưh khan lăp pơjing đei tơdrong jang sa ăn rơbou ‘nu bơngai mă oei tơgop pơm hơtŏk mŭk drăm atŭm kơ tơring. Ƀok Liêng Hót Ha Kliêng oei tơ̆ tơring N’Thôn Hạ, apŭng Đức Trọng ‘noh mĭnh lơ̆m dôm bơngai jang ‘lơ̆ng kơ Khul bơngai kră lơ̆m tơdrong hok pơhrăm păng pơm kiơ̆ jơhngơ̆m đon ‘lơ̆ng kơ Ƀok Hô. Ƀok tơbăt, lăp đơ̆ng rŏng rơngei sơnăm 1975, ƀok vang iung jang lơ̆m khul choh hơpong, vang jang lơ̆m hơp tak xah, 8 sơnăm bơ̆ jang Kŏng ang pơlei găh khul kŏng ang tơring. Ƀok ling lang jang kiơ̆ kơjăp trong bơ̆ jang đơ̆ng Đảng, khôi luơ̆t Teh đak.“Ba bơ̆ jang tơpôl jei ‘meh vă pơdơ̆h ră bơih, mă lei kơdră tơring oei ‘meh kơ ba kơna ba hơdrin đĕch bơih. Ba iŏk chĕp pơgơ̆r khul Bơngai kră kơ pơlei. Ba jang pơ yoa ăn kơ kon pơlei, kơ dih ba kơna ưh kơ pơ koel đei iŏk yua sa hơpăh ou to ôh. Sơ̆ lơ̆m khei ‘năr ‘nao rơngei ‘noh jĭ tôch mơmat tat, gleh hrat băt dang yơ ba jei bơ̆ jang ‘lơ̆ng. Ba hơpơi ‘meh vă jơhnơr mơlôh hơdrin kiơ̆ yok rok jơ̆ng hơdrin hŏk pơhrăm, jang sa, pơm kiơ̆ ‘lơ̆ng trong bơ̆ jang đơ̆ng Đảng, khôi luơ̆t Teh đak”.

Lơ̆m 5 sơnăm ou ki, đơ̆ng kon jên jang tơm teh đak hlôi hơvơn đei 15.000 ti hlak jên vă tơ iung pơjing tơring tơrang ‘nao, lơ̆m dêh char Lâm Đồng hlôi đei 76 lơ̆m 78 tơring kon kông iŏk đei jing tơring tơrang ‘nao, 15 tơring iŏk đei jing tơring tơrang ‘nao ‘lơ̆ng liĕm; 4 tơring iŏk đei jing tơring pơm jŭk yŭk trong hơlou. 5 sơnăm ou ki, akŏp kon jên ‘măn ăn tơring kon kông tơ̆ Lâm Đồng hloh 1.264 ti hlak jên. Đơ̆ng noh, tơgop hơmet pơ ‘lơ̆ng tơdrong hơrih sa, jang sa kơ kon kông. Truh dag ei, ŭnh hnam dơnuh tơring kon kông lơ̆m dêh char Lâm Đồng hlôi tơjur pă 2%; jang sa iŏk đei jô hơtŏ măt bơngai hloh 50 triu hlak jên. Ƀok K’Beo, Kơ iĕng Kơdră Jơnŭm vei lăng kon pơlei tơring N’Thôn Hạ, apŭng Đức Trọng, dêh char Lâm Đồng tơbăt: “Sơ̆ kon kông bơ̆n jang sa tim gan hlôh vao. Đơ̆ng rŏng rơngei, teh đak rơngei keh kong, đei trong chông ba, chĕp pơgơ̆r đơ̆ng Đảng, Teh đak kơna kon pơlei băt jang sa, tơdrong hơrih sa tơ̆ ou hlôi tơplih ‘lơ̆ng hơ iă pơtêng hăm hơdrol khei ‘năr rơngei. Tơdrong tơ iung pơjing trong nơnăm hlôi đei tơmơ̆t jên jang lang să trong ‘lơ̆ng liĕm đei Trung ương tơmơ̆t ăn jên jang. Kon pơlei chơt hơ iă dêh, pơtho khan dih băl hơdrin jang sa vă jang sa đei iŏk yua kơjăp hloh dơ̆ng”.

Dôm tơdrong tơplih kơtang tơ̆ tơring kon kông dêh char Lâm Đồng tơƀôh hơdăh tơdrong lăng ba đơ̆ng Đảng, Teh đak păng tơdrong hơdrin kơtang đơ̆ng kơdih kon pơlei pơla. Đơ̆ng mĭnh groi teh oei mơmat tat, dang ei hlôi pơjing đei ‘lơ̆ng rŏ hơbŏ nhen hăm dôm trong nơnăm thơ thŭr să ‘lơ̆ng, dôm trong choh jang sa hơnhăk đei iŏk yua kơjăp păng hơrih sa kơ kon pơlei roi năr roi phĭ tơtŏ hơnŏ ‘lơ̆ng, hơnŭk hơnoa. Tơdrong jơnei ou ưh khan lăp tơgŭm pơm hơtŏk ‘lơ̆ng tơdrong hơrih sa mă oei pơm hơmet pơ ‘lơ̆ng jơhngơ̆m đon lui yom kơtang đơ̆ng kon pơlei hăm trong bơ̆ jang đơ̆ng Đảng, đơ̆ng Teh đak tôch trŏ lăp dơ̆ng. Hăm hơyak atŏk tơ iung ou, Lâm Đồng ưh kơ jor gô hơnơ̆ng sơkơ̆t hơdăh hơnih dơ̆ng ‘lơ̆ng kơ mĭnh tơring yak hơlou lơ̆m tơdrong jang tơ iung pơjing tơring tơrang ‘nao, tơgop lơ̆m tơdrong atŏk tơ iung atŭm kơ tơring Tây Nguyên păng lơ̆m Teh đak.