Hrei ou, trong nơnăm tơring Tŏk bŏk-Tây Nguyên roi năr roi đei tơmơ̆t jên jang, mă kăl rim trong gre rĕnh Tu-Pơbăh păng dôm trong tơƀưh dih băl Hơlĕch-Pơmơ̆t ƀar păh Tây Nguyên hăm tơring tơmăn. Lơ tơdrong vă jang tŏk bŏk đei tơlĕch jang nhen Quy Nhơn – Pleiku, Khánh Hòa – Buôn Ma Thuột, Gia Nghĩa – Chơn Thành… đei hơmŏ pơih dơ̆ng cham char atŏk tơ iung, pơm đei trong djăl chă yơ yak păng pơjing rơvơn ăn tơmang pơhiơ̆, logistics, mơdro sa.

Mă lei, kiơ̆ đơ̆ng rim bơngai tang măt, tơmơ̆t jên jang trong nơnăm ưh khan lăp pơdơ̆h ƀơ̆t rim jăl trong teh. Tơdrong kăl hloh ‘noh kăl pơjing đei tơƀưh dih băl ‘lơ̆ng hơ iă ƀar păh rim tơring kơdrơ̆m, dơnŏk đak dơsĭ, cham gre păr, ‘măng sơlam teh đak, hơnih tơm logistics păng rim hơnih truh tơmang pơhiơ̆. Ƀok Nguyễn Trùng Khánh, Kơdră chĕp pơgơ̆r Hơnih tơm vei lăng Tơmang pơhiơ̆ Teh đak Việt Nam akhan, trong gre jĭ tơdrong kăl hloh vă iung jang jơnei dôm hơnih tơmang pơhiơ̆:“Kiơ̆ kơ ĭnh tơdrong kăl hloh mă blŭng ‘noh hơmet pơ ‘lơ̆ng trong nơnăm, tơdăh trong ưh kơ tơƀưh dih băl lei rim hơnih tơmang pơhiơ̆ mă đơ̆ng đei ‘lơ̆ng hơ iă tôch dang yơ ră mă lei jei ưh kơ đei hơnhăk đei tơdrong yă kiơ mơ̆n, ưh kơ gơh vă atŏk tơ iung tơgăl hăm tơdrong đei ôh.Tơroi truh trong nơnăm ưh khan lăp trong nơnăm đĕch ôh mă lei oei truh hloi trong nơnăm tơ̆ rim hơnih tơmang pơ hiơ̆ ‘noh mă pơjing đei tơdrong kăp gĭt vă tơmoi năm tơmang lăng, pơm hơtŏk ‘lơ̆ng hơ iă hơnih truh, pơm hơtŏk tơdrong kĕ pơjei kơ hơnih truh”.

Tơ̆ Hop akŏm, rim hơnih bơ̆ jang vei lăng, tơring păng hơnih mơdro sa hlôi atŭm dih băl pơma dơnuh găh trong tơmơ̆t jên jang, hơvơn tơpôl vang jang, atŏk tơ iung logistics, ming hơmet trong nơnăm tơ̆ rim tơring, hơnih tơmang pơhiơ̆ păng atŏk kơtang iung jang hơdoi ƀar păh rim tơring. Tơdrong lei lăi dih băl ‘noh tơplih đơ̆ng trong jang atŏk tơ iung tơmang pơhiơ̆ kiơ̆ tơring jing kiơ̆ cham char.

Hăm Gia Lai, lăp đơ̆ng rŏng hơgrop, đak dơsĭ păng groi kông, tơring đei rơvơn pơjing đei tơmam drăm kiơ̆ trong “đak dơsĭ-tơring tơmăn-groi kông-bri brăh”. Kơ iĕng Kơdră chĕp pơgơ̆r Hơnih vei lăng kon pơlei dêh char Gia Lai Nguyễn Thị Thanh Lịch akhan, tơmơ̆t jên jang trong nơnăm tơƀưh dih băl tơring mĭnh păh pơjing hơyak kăl hloh ăn hơnô̆ hơnăp kơnh pơđĭ tơring Tŏk bŏk-Tây Nguyên, mĭnh păh pơm ăn kĕ tŏk mŭk drăm 2 kơsô̆ kơ rim dêh char lơ̆m jăl truh ou kơnh:“ Mưh pơih să cham char ‘nao lơ̆m ou đei trong nơnăm tơmang pơhiơ̆ ưh khan lăp hơdrô̆ Gia Lai tŏk mŭk drăm 2 kơsô̆ mă rim dêh char pơlei tơm jei sơđơ̆ng hăm dih băl găh tơdrong atok tơ iung atŭm”.