Trong glung 1 Dak Nông, jăl trong găn hloh thôn 3, tơring Quảng Tâm, apŭng Tuy Đức đei ƀôh lơ sơlŭng să truh 1 met, jrŭ hloh jơ̆ng bre. Tơ̆ lơ jăl trong, trong hlôi pơchăh pơchek, lăp hơdrô̆ tơmo. Rim ‘măng gre kơdou trong ou, ‘mui gơlŭng gơlăng pơm ăn kon pơlei oei ƀar păh trong gre măh ĕnh jơhngơ̆m. Ƀok Trương Anh Bằng, tơngla hnam et sa tơ̆ Quảng Tâm tơbăt, trong gre hư răm hlôi đơ̆ng lơ sơnăm. Mă đơ̆ng rim sơnăm jei đei ming hơmet, mă lei ưh kơ đunh trong ou hư răm dơ̆ng."Hnam nhôn tĕch mơdro tơmam sa tơ̆ ou jĭ hơnơ̆ng tang ‘măng pơnil vă hoei kơ ‘nhui mơ̆t lơ̆m ‘nhĕm ‘nhot. Găh kơƀang tang dŏ hơnơ̆ng chă sut 2-3 ‘măng lơ̆m mĭnh năr mă lei oei ưh kơ kĕ rơgoh. Lơ mĕ ƀă chơ kon năm hŏk năm hŏk tro ou pơ̆k hơbĕn ao ‘mê̆ ‘mach kơ ‘myao. Đe kôn mon năm hŏk chă pơ̆k jei ‘mê̆ ‘mach đĭ, ba măh ăn đak vă kơ đe sư chă ôp. Đe jei hlôi ming hơmet mă lei trong oei hư răm hơnơ̆ng đĕch, ‘mê̆ ‘mach dêh."

Trong glung 1 tơ̆ dêh char Dak Nông hư răm kơtang ưh khan lăp pơm kơnê̆ truh tơdrong mơdro sa păng tơdrong hơrih sa kơ kon pơlei mă lei oei pơm ăn gre kơdou hư răm dơ̆ng, jơ chơ tơmam drăm đunh hloh dơ̆ng păng tơhoach đak săng đak dou lơ hloh dơ̆ng pơm ăn kon jên chơ tơmam drăm tŏk lơ. ‘Nhŏng Nguyễn Kim Toàn, mĭnh ‘nu vơ̆r gre tih chă hơlen:“Ĭnh năm đơ̆ng Quảng Tân mơ̆t tơ̆ Đắk R’tih dăh mă dôm tơring anai lơ̆m tơring ou tơhoach jơ ‘năr hloh 2-3 ‘măng pơtêng hăm sơ̆. Sơ̆, gre kơdou lăp tơhoach 3 – 4 kơlit đak dou, mă lei dang ei tơhoach 9-10 kơlich. Sơ̆, trong ‘lơ̆ng, tơplih lôp gre dang 1 sơnăm 1 poăt mĭnh ‘măng, dang ei tơplih lôp gre dang 7-8 khei ‘noh tơplih mĭnh ‘măng."

Trong glung 1 jĭ jăl trong kăl hloh, tơƀưh apŭng sơlam teh đak Tuy Đức hăm apŭng Đắk R’lấp, tơƀưh hăm trong glung Hồ Chí Minh hăm Trong glung 14C păng ‘măng sơlam teh đak Bu Prăng năm tơ̆ teh đak Campuchia, jĭ trong kăl hloh ăn chơ choĕn tơmam drăm, pơtrŭt kơtang atŏk tơ iung mŭk drăm-tơpôl păng sơđơ̆ng tơring sơlam teh đak Tuy Đức. Tơdrong tơm pơm ăn hư răm kơtang kơ trong ou ‘noh kơ yuơ gri tih chơ trăp, gre chơ tơmoi kơdou trong ou tôch kơ lơ lơ̆m dôm sơnăm ou ki, lơ̆m mă bơ̆ jang ming hơmet rim sơnăm ưh kơ gan hơnơ̆ng.

Ƀok Dương Huy Toàn, Bí thư Đảng apŭng Tuy Đức, tơbăt, apŭng hlôi pơtruh hla bơar ăn Hơnih vei lăng kon pơlei dêh char Dak Nông păng Hơnih tơm vei lăng Tơ iung pơjing ming man apĭnh ăn asong kon jên ming hơmet trong ou. Dang ei, nơ̆r apĭnh ou hlôi đei kĭ tơchơ̆t păng tŏk bŏk gô chang xek tơlang rim hla bơar ou to.“Dêh char hlôi hơlen iŏk kon jên jang Trung ương vă ăn ming hơmet trong ou. Găh trong jang păng kon jên jang, rim hla bơar ou to tŏk bŏk pơm tơlĕch vă gơ̆h iung jang ming hơmet trong ‘nou lơ̆m hơtuch sơnăm ou.”.