Thủ tướng Lê Minh Hưng pơma akhan, ‘măng năm ngôi gô tơgop hơmet kơjăp đon lui chinh trĭ, hơtŏk tơdrong pơvei đơ̆ng kơdră chĕp kơ̆l 2 teh đak păng tưk tơiung tơdrong jang hơdoi đơ̆ng 2 Quốc hội. Thủ tướng pơma hơdăh, Việt Nam ling lang pơ 'nhŏ tih hlŏh ăn tơdrong pơvei hăm teh đak Lào; atŭm hăm 'nŏh jang hơdoi kơjăp hăm Khul kơdră teh đak păng dôm anih jang kơpal đei ƀơm truh kơ teh đak Lào tơlĕch jang đei yoa 'lơ̆ng dôm tơdrong pơkăp hlôi đei drơ̆ng nơ̆r.

Ƀar păh drơ̆ng nơ̆r pơjing hơyak tŏk pran lơ̆m tơdrong jang hơdoi mŭk drăm, tĕch mơdro păng tơmât jên jang; hơtŏk tơdrong pơm trong tơƀưh, unh hơyuh, tơplih hăm kơmăy sô̆, tưk tơiung khul bơngai jang păng hơtŏk tơdrong pơvei ăn kon pơlei. 2 teh đak oei vă pơgơ̆r jang hơdoi 'lơ̆ng dôm tơdrong jang lơ̆m “Sơnăm pơvei, mât mĭnh ƀơ̆r đon kơjăp 'lơ̆ng Việt Nam - Lào 2027”. Kơdră Quốc hội Lào Sonexay Siphandone pơma hơdăh, Quốc hội Lào gô hơnơ̆ng jang hơdoi kơjăp hăm Quốc hội Việt Nam, tơgop pơm hơtŏk tơdrong pơvei kăp gĭt, mĭnh ƀơ̆r đon kơjăp 'lơ̆ng, jang hơdoi tôm tơdrong păng đunh đai đơ̆ng 2 teh đak roi đunh tŏk roi pran kơjăp hlŏh dơ̆ng.